Ka long ka khubor ba sngewtynnad na ka bynta ki nongkyrshan Prah (Voice of the people’s party – VPP) ha kaba ki la buh ia ka khana pateng (history) ha ka jingiakhun sha ka Khasi Hills Autonomous District Council (KHADC) da ka jingjop don burom ha ka jingiakhun ba nyngkong jong ki na ka bynta ka Elekshon KHADC bad JHADC.
Na 29 tylli ki konstitwensi ba hap ha KHADC, u Prah u la ioh ia ka jingjop kput, kata haduh 17 tylli ki konstitwensi. Ka NPP kaba ialam ia ka EC ha ka samoi ba lah dep ka la ioh ban jop 5 tylli ki shuki, ka UDP 4 tylli ki shuki, ka HSPDP ka jop tang kawei ka shuki bad 2 ngut ki kyrtong khlem seng (Independent) kiba la ioh ia ka jingjop kaba khlem poi pyrkhat kynthup ia u Bah Ricky Shullai (khun pyrsa u Bah Sanbor Shullai MLA Laban Konstitwensi).
Ka Mawlai kaba dei ruh ka konstitwensi ba heh tam ha KHADC ka la pynshaiong biang sa shisien ia ki paidbah ka jylla ha kaba ka VPP ka la tam haduh 9000 tam ia u MDC barim kane ka konstitwensi, kata u Bah Teibor Pathaw.
Bun ki kyrtong ba paw bad kiba don ha ka EC ki la khyllem ha kane ka Elekshon. U Bah Pynshngaiñ Sing Syiem uba dei ruh Chief Executive Member (CEM) ka KHADC ha kane ka samoi ba lah dep, u la liem ha u kyrtong ka VPP Bah Winston Tony Lyngdoh. U Bah Pynshngaiñ N. Syiem uba dei u Dkhot ka EC (kyrtong Congress) u la liem ha u kyrtong ka VPP Bah Denzil Raynard Chen.
Kaba kham lyngngoh ka long ba ka Congress kaba dei ka seng kaba khlaiñ bad ka bym ju pep ban sei ia ki Nongjop ha man ki Elekshon, ka la long da khongpong mynta u snem da ka jingkhyrwit u Prah ha jan baroh ki konstitwensi, ka Congress ka khlem ioh tang kawei ruh ka jingjop mynta u snem. Nalor kata, ka KHNAM kaba dei ruh ka seng riewlum kaba la ioh jingshaniah naduh ki snem ba la leit, mynta u snem ka khlem ioh wat tang kawei ruh ka jingjop.
Lyngba kane ka jingjop don burom, u Prah u la tikna ba un synshar marwei ha KHADC da ka jingjop 17 tylli ki shuki, namar katkum ka jingbuh jong ka election commission, kano kano ka seng ka ban shimti ia ka bor synshar ha KHADC kam dei ban duna ia ka 16 shuki (seat) ha ka jingdon ki MDC, kaba mut u Prah un synshar marwei khlem da synrop lang bad kano kano ka seng.