Ki trai hali bad ki Nongrep ha ki bynta jong ka Pynthorneiñ kaba dei ka ‘pliang ja’ jong kiba bun balang, mynta u snem kila ngat haka jingsngewsih kthang bad ka jingjaw ummat na ka daw ka jingshah pynjulor ki hali rep na ka jingwan poi ka khyndew, u shyiap bad ki maw lyngba ka ‘liar Kamkam’ hadien bala pyntrei ïa u surok By-Pass na Khliehtyrshi haduh Tre Iongriang.
Kane ka jingshah pynjulor jong ki hali kala jur shaba palat mynta u snem wat ka lynti ïaid jong ka wah ‘liar kamkam’ kala kylla da kaba tuid noh lyngba ki hali kiba don ha Pynthorneiñ haduh ba ki nongrep kim lah shuh ban pynkhuid ïa kitei ki maw bad u shyiap kiba la tap lut ïa ki kba uba dang shu dep thung.
U President ka Khooid Ya Ka Wah Myntdu u ma Khroo L. Pariat mynta ka sngi ula hiar ban sakhi lang ïa katei ka jingjia ha kaba la lap ba kitei ki hali kila shah ktah shisha. U la ong kane ka dei na ka daw ka jingpyntrei ïa u surok By-Pass namar ïa ka khyndew kaba la theh pathar la kit noh da ka um sha kine ki bynta jong ka Pynthorneiñ.
“La kumno kumno ki longïing kiba shah ktah ha kane ka jingjia kim duna ïa ki 10 tylli, katba ki nongbam kiba dang shaniah ïa u kba na kane ka jaka lada shim ïa ka jingïoh ïa u kba kala poi sha ka 600 byrni ka jingduh nong”, la ong u ma Pariat.
Ula ong kane ka jingduh nong ka long na ka jingbym shim khia jong ki bor District wat hadien ba ka seng ki nongrep ka “Ka Myntdu Pynthorneiñ Farmer Welfare & Producer Organisation” (MPFW&PO) kala dep ban ujor ha u DC naduh u bnai January, 2022 ban dawa pynsangeh ïa ka jingtheh khyndew pathar, hynrei ki bor ba dei peit kim shym la pyntrei kam ïa ka bor katkum kane ka jingai jingmut ka seng.
Kumba long mynta ula kren diaw ba ka sorkar kam sngap shuh ïa ka jingeh jong ki nongrep bad kumjuh ïaki trai hali kiba pynmih ïa u khaw u kba. Ula kren shai kum ka seng “Ka Myntdu Pynthorneiñ Farmer Welfare & Producer Organisation” (MPFW&PO) ha ryngkat ki trai hali bad ki nongrep kim banse ban leit ujor noh ïa kane sha ïing bishar jong u District Session Court ha Khliehtyrshi.
Ula ban jur halor ka jingïoh lad jong ki briew ban tei ïing hajan ka Wah Myntdu bad kane kala buh jingeh ïa ka Wah na ka jingmih ki jaboh jabaiñ kiba harukom bad leit tuid sha ki bynta ka Wah.
Ka kong Middle Pakynteiñ kawei na ki trai hali ba shah ktah kala ong “Ngi la duh ïa u kba u khaw bad ngi la duh ruh ïa ka um bam kaba khuid ba suba”. Kumta ka kyntu ïa ka sorkar ba kan shim khia ïa kane ka jingeh kaba la pynkthang mynsiem ïa ki na ka jingshah pynjulor ki hali.
U ma Kamniwan Pakynteiñ trai hali ula ong mynta u snem ka jingduhnong kala jur bha ym kum ha ki snem ba la dep, kumta u buh ka jingkyntu ïa ki bor sorkar ban peit ïa kane ka jingeh.
Sa uwei u trai hali ma Mikil Rymbai ula ong la 70 tylli ki snem ba ula ju rep ha kane ka jaka, kane ka dei ka jingduh nong kaba khraw eh naduh u trai hali bad haduh u nongbylla rep, ula ong mynshwa ka jingpyntrei ïa u surok na Riatturiem kam shem ktah namar la trei da ka bor briew, hynrei mynta da kaba pyndonkam da ki kor ki bor la pynjulor tang ha ki kyndiat kynta, halor kane ka sorkar ka dei ban wan jurip ïa kane ka jingeh, u la pynkut.
