Ka All Jaiñtia Muster Roll Workers & Labour Union (AJMRW&LU) CEC Jowai ha ka Dorbar Kut Snem kaba long ha ka sngi Balang 17/09/2025 ha ïing Dorbar ka Dulong, Jowai kala ïoh ban jied pynthymmai ïa ki nongkitkam na ka bynta u snem 2025-2027.
Na ka liang ka AJMRW&LU kala jied biang ïa u ma Khroo L Pariat ban long u nongialam ba rangbah (President) jong ka sha ha kane ka kynti. La jied ruh ia ka kong Basic Dora Thubru kum ka Vice President, ma Phrangsngi Sutnga-Vice President, kong Bniah Sapuh-Vice President, kong Dayoowanphi Iakai-General Secretary, kong Wegetwell Ramut-Asst General Secretary, kong Wandakaru Shullai-Asst. General Secretary, kong Phaibiang Phawa-Asst General Secretary, kong Alginia Ryngkhlem- Finance Secretary. Lem bad ki 25 ngut ki dkhot ka seng kmie ba mihkhmat na ka West & East Jaiñtia District, ki C&RD Block bad na Shillong jong ki tnat treikam ka Sorkar jylla.
Ha kane ka Dorbar la shim ïa ki rai kiba kham kongsan ban kyrpad ïa baroh kiba trei kum ki Muster Roll ha ki tnat sorkar ba kin trei tista ïala ka kam kaba la bynshet ha ki katkum ki kyndon ka sorkar.
Yn buh jingkyrpad ïa ki heh jong ki tnat sorkar naduh kiba don ha Shillong haduh kiba don ha ki District bad Sub-Division ba ki dei ban pyntreikam beit ïa ki hukum katkum ba la bthah na ka tnat Personel, ka tnat Finance bad Labour jong ka Sorkar jylla sha baroh kiba trei Muster Roll kiba dei hok ban ïoh ym ban pyntreikam ha ka jingsngew shimet ne ïa kiba don ka jingïadei ba haïing ne dei na ka juh ka seng saiñ pyrthei.
