U bah Pynshngaiñ N. Syiem uba dei u Working President jong ka Meghalaya Pradesh Congress Committee (MPCC) u ban sa ia aireng ruh ha kane ka elekshon MLA 2023 na Pynthorumkhrah pyrshah ia u bah AL Hek, haba ai jingkren ha ka jingialang paidbah jong u kyrtong ka Congress na ka 4-Mowkaiaw Constituency u ma Nehimaya Tyngkan ula ong ba la thikna ka Congress kan ioh ban thaw sorkar ha kane ka samoi ban wan jong u 2023.
U ba Pynshngaiñ ula kren pynthikna bha ba ka Congress kan sa jop na Mawhati, Mylliem, Mawkyrwat, Pynthorumkhrah, na Mowkaiaw bad na kiba bun kiwei de ki Constituency. U la ong ba don kiba ong ba ka Congress kam lah shuh ban thaw Sorkar namar kam don briew shuh, hynrei ula pynkynmaw ba kumno u (L) Dr. F.A. Khonglam wat la u long marwei kum u Independent Candidate u dang lah ban long u Chief Minister ka sorkar Jylla, kumta kam long kaba eh ia ka Congress ruh ban thaw sorkar ha kane ka kynti ban wan.
U bah Pynshngaiñ ula khot la wer ia ki paid nongshong shnong jong ka thaiñ 13 Shnong ba kin nang ban jied ia kita ki Kiang Nangbah bad ki Tirot Sing jong ka juk mynta khnang ba kin lah ban ialam ia ka Ri bad ka jaid bynriew. U Khot ia ka jingkyrshan jong ki nongshong shnong ia u ma Nehimaya Tyngkan uwei na ki samla rangbah ba dang khlaiñ ki bor jingmut jingpyrkhat bad ruh uwei na ki trai shnong uba tip bha ia ka eh ka shon jong ki nongshong shnong khamtam kito ki shnong kiba hap ha ki bynta khappud bad ka Jylla Assam kiba la mat ia shibun ki jingeh kiba har rukom.
U ong ba kum ki nongshong shnong ki dei ban jied ia ki nongmihkhmat kiba skhem ka jingmut jingpyrkhat, kiba nud, kiba tip bad shemphang, kiba ieit ia ka kynja bad ki bym ieit sbai.
U bah Syiem ula pynkynmaw ba ki sorkar kiba la dep kila pynmih shibun ki aiñ ki kanun kiba ktah haduh katta katta ia ka Ri bad Jaitbynriew Khasi-Pnar. Naduh ka jingpyrshang ban pynrung ia ka CAA, ka jingbyn ailad shuh ban tih ia ki marpoh khyndew napoh ka ri lajong, bad bunsien kine ki aiñ kila teh mraw pynban ia ki nongshong shnong jong ka Jylla ula ong shuh shuh.
Kiwei de kiba la ai jingkren ha kane ka jingialang ki kynthup ia u ma Rikut Parien uba dei u President jong ka Block Congress Committee.