Ka “Federation of All School Teachers Of Meghalaya (FASTOM) ka ba dei ka Federation jong ki nonghikai skul adhoc ka la pynlong ia ka General Central Executive Meeting ha ka tarik 14.09.2024 ha Dobasipara Secondary School, Tura, West Garo Hills. Ia ka jingialang la pyniaid da u Vice President ka Federation Sir. Sanborn Jungai bad la sdang ia ka jingialang da ka jingduwwai u Sir, Sotten G. Marak. Haba sdang ka jingialang, la ioh ka jingkren pdiang da u Sir. Elvist R. Marak, General Secretary ka Federation ha Garo Hills Region.
Ka Agenda ba ka ia kren ka long halor ka “Jingiehnoh Kam U President Sir Diningroy Marwein”. Ka General Central Executive Meeting, ka la ioh ban ia thir bniah bha bin pa bin halor ka jingieh noh kam kynsan u President bad ha ka jingiakren ba bniah bha, ka Central Executive Meeting, da ka wei ka sur ka la shim ia ka rai bad la pdiang ia ka kum ba ka long.
Hadien kata, ka GCEC ka la jied noh ia u Sir. Moonroy G. Momin ban long kum u President ba thymmai ka FASTOM Central Body. Ha ka juh ka por, da ka wei ka jingmut ka Central Executive Meeting ka la jied pat ia u President ba dang shu iehkam noh Sir. Diningroy Marwein ban long kum u Chief Adviser ka Federation. Khatduh eh, la ioh ruh ka jingkren lyngkot na u President ba rim Sir.Diningroy Marwein ha ka ba u la ai khublei kitbok kitrwiang ia u President ba thymmai ba un ioh ka met kaba koit ba khiah bha ba un nang lah ban ialam bha shaphrang ia ka Federation ha ki por baroh.
Kane ka long katkum ka jingpyllait khubor na u ma E.G. War, Publicity Secretary FASTOM Central Body.