Ka 8th Sailadhar Baruah Film Awards (North East) 2025 ka la khang pyrda noh ha ka jingrakhe baphuh baphieng ban pynkup burom ia ka jingpliah ki durim na kylleng ka thaiñ shatei lammihngi ka Ri India. Ka tamasa durim ba arsngi ha ka 10 bad 11tarik Kyllalyngkot 2026 ha Jyoti Chitravan, Guwahati.
Ia ka khusnam lahduh kum ka durim bakynsai tam la iohnam da ka durim Apot ba la pynmih da u Bah Raphael Warjri u ba la ioh ka takma, ka syrnot bad ka pisa ba sanphew hajar tyngka, bad u Bah Augustine Kurbah u ba la pynbiang ia ka surrwai surtem u la ioh ia ka khusnam lahduh kum u duhalia rangbah bakynsai tam ryngkat ka takma, ka syrnot bad ka pisa ba arphew hajar tyngka.
Kiwei kiwei ki ba la ioh khusnam ki kynthup ia u Prakash Deka Best Director ia ka durim Nora (Assamese), Best Screenwriter ia u Sanjib Sabhapandit na ka bynta ka durim Aakash Heno Nodir Naam (Assamese), Best Cinematography ia u Aniruddha Barua ia ka durim Taarikh, Best Sound Design da u Manas Protim Goswami ia ka durim Nora. Priyakanta Laishram u la jop Best Film Editor ia ka durim Oneness (Manipur), bad Best Art Director was awarded to Bhaskar Jyoti Kalita ia ka durim Woodcutter (Assamese).
Ki tyngshop puron ba kynsai tam la ioh khusnam lahduh da u Raju Roy ia ka Best Actor (Male) ia ka durim Noi Kotha (Assamese), bad ka Rodali Bora ka la iohpdiang ia ka Best Actor (Female) ia ka durim Burkha (Assamese). Ki nongbishar ki la nam ruh kum ki durim bakynsai ia u Jatindranath Khanikar kum u tyngshop ha ka durim Burkha and Gomon (Assamese). Kumjuh ruh ia ka durim Brahmakanya (Assamese) da u Dhiraj Kashyap (producer-director) bad u Khajan Kishore Nath, kum u nongshna ia ka durim Kangbo Aloti (Karbi film).
La jied 26 ki durim ba la phah na kylleng ka thaiñ shatei lammihngi, ba na ka jylla Meghalaya don laitylli ki durim ka Apot, Lanot bad Tyngkai.
La pynphuh pynphieng ia ka tamasa durim da ka khlur puron bad thohdurim, ka Suhasini Mulay kum ka kongsan ryngkat ki symbud kongsan ba kynthup ia ka Manjula Barua bad Jahnu Barua, ha ka ba don ryngkat ki dkhot rangbah ka Sailadhar Film Awards 2025, u khliehduh Mrinmoy Baruah, bad u saiñpyniar, Ranjit Das.
Ka Suhasini Mulay ka la iaroh ia ki tyngshop puron bad ki riewtbit bapher bapher ha ka ba shna durim na ka thaiñ shatei lammihngi ki ba la pynpaw la ka jingtbit ba kynsai kat ki ba na kylleng ka Ri bad kylleng ka pyrthei, wat lada na dewbah India ka don ka rukom ban iuhroit ia ki paidbynriew ba na ka thaiñ shatei lammihngi. Ka la iathuh ruh ia ki kam ba la ia tyngkhuh bad ki riewkhraw ha ka shna durim kum u Mrinal Sen bad Satyajit Ray, ki ba long ki nongmuna ba shynna jong ki riewtbit shna durim ha Ri India.
Ka 8th Sailadhar Baruah Film Awards 2026 ka long ka rynsan ka ba la pynkha ia ki katto katne ki durim bakynsai na ka thaiñ bad la khmih lynti ba kan dang iaineh ban kyntiew ia ki nongshna durim na ka thaiñ.
