Ka jingïalehkai phutbol 1st Division bala pynïaid da ka East Jaiñtia Hills District Football Association (EJHDFA) kaba la long mynta ka sngi ha madan Deinchynrum, Khliehriat.
Haba phai sha ka jingïakhun kaba nyngkong kaba la long hapdeng ka Rynbai Synrang Shahkhain SC bad ka Pamra paithlu SC kila poi sha ka jingïakhaid khlem da don kiba thep kol 0-0.
Ha ka jingïakhun kaba ar ka Khliehriat West FC kala lah ban pynliem da 3-1 kol ïa ka Lumputhoi SC, ïa ki kol na ka Khliehriat West FC la thep da u Jasmine Talang haka minit ba 4 & 10 bad u Silgrak Pala haka minit ba 43. Katba ïa ka shikol na ka liang ka Lumputhoi SC la thep da u Rishan Lyngdoh haka minit ba 17.
La ïathuh ki kynhun kiba ïoh rung sha ka jingïakhun ‘Quarter Final’ jong kane ka lympung ïalehkai phutbol 1st Division ka EJHDFA ki long ka Rymbai Synrang Shahkhaiñ SC, ka Khliehriat West FC, ka Wahiajer NYSSC, ka Rangad SC, ka Ladrymbai-B SC, ka Tpepswer SSWO, ka Chiehruphi SYWSC bad ka Byndihati SC.
Katba ki kynhun (team) kiba shah pynhiar kyrdan naka 1st Sivision sha ka 2nd Division ha ka aiom ïalehkai ban wan ki long ka Lumputhoi SC, ka Rymbai Pohskur SC, ka Pamra paithlu SC, bad ka Musniang SC.