Ka jingïalehkai phutbol bala tip kum ka 6th Debo Shullai Memorial Trophy jong ka kyrdan 2nd Division Football Tournament 2023 ba la pynïaid da ka West Jaiñtia District Sports Association (WJDSA) kala sdang mynta ka sngi ha madan Kiang Nangbah Stadium, Dongmihsngi Jowai.
Haba phai sha ka jingïakhun ba nyngkong jong kane ka lympung mynta ka sngi ka Maitshaphrang Mootyrchiah kala pynliem da 3-1 kol ïa ka Caroline Colony, ïa ki kol na ka Maitshaphrang Mootyrchiah la thep da u Batskhem Dkhar haka minit ba 63, u Raymond Sten haka minit ba 66 bad u Arwan Lyngdoh haka minit ba 77. Ïa ka shikol na ka Caroline Colony la thep da u Gestar Light Dkhar ha ka minit ba 40+1.
Katba haka jingïakhun kaba ar kaba la long hapdeng ka Nangbah Dukhu pyrshah ïa ka Khliehmynkrem kila poi noh sha ka jingïakhiad da mar 1-1 kol, ïa ka kol na ka Nangbah Dukhu la thep da u Ewanmi Pasi haka minit ba 17. Na ka liang ka Khliehmynkrem la thep da u Pascal Phawa haka minit ba 76.
Ka jingïakhun lashai ka sngi 23 tarik u Nailar kan long hapdeng ka Chutwakhu pyrshah ïa ka Dongmihsngi ha ka por 12 baje mynsngi, katba ka Lumpariat kan ïakhun pyrshah ïa ka West Madan Mustem ha ka por 2 baje nohphai sngi.