Ka lympung ïalehkai jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha Kiang Nangbah Stadium, Dongmihsngi Jowai.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun na ka liang ka kynhun ïalehkai jong ka Nangbah Iawmusiang SC kala lah ban pynliem da 3-0 kol ïa ka Mukhla Raij SC, ïa kitei ki lai kol na ka Nangbah Iawmusiang la thep shwa da u Wanbiang Passah ha ka minit ba 20, katba ar (2) kol la thep da u Dawyoolangki Pasi ha ka minit ba 39 bad 55.
Ka kynhun ïalehkai jong ka Mukhla Raij SC kala pyrshang katba lah ban pynphai ïa kitei ki kol hynrei kam lah satia tad haduh ba kut jong ka jingïalehkai kala neh da 3-0 kol.
Ka jingïakhun lashai ka sngi 19 tarik kan long hadpeng ka Demthring SC pyrshah ïa ka Chutwakhu SC ha ka por 2 baje shiteng nohphai sngi.
