Ka lympung ïalehkai phutbol bala tip kum ka Thadlaskeiñ Football League 2024 bala pynïaid da ka Thadlaskeiñ Sport Association kaba la long mynta ka sngi 7 tarik u Kyllalyngkot, 2025 ha madan mini Stadium Wahiajer West Jaiñtia Hills District.
Haba phai sha ka jingïakhun ba nyngkong hapdeng ka Madur pyrshah ïa ka Ryntih Mynsngat kila poi sha ka jingïakhaid da mar shikol (1-1), ïa ka kol na ka Madur la thep da u Riang Laloo haka minit ba 6, na ka liang ka Ryntih Mynsngat la thep da u Ryntih Shylla haka minit ba 39.
Haka jingïakhun kaba ar ka Nartiang kala pynliem da 2-0 kol ïa ka Mukhla Veteran, ïa kitei ki kol na ka Nartiang la thep da u Pynkhap Law haka minit ba 38 bad u Pynïohlad Bhoi haka minit ba 68.
Katba ha ka jingïakhun kaba lai ka Grounded FC kala pynliem da 2-0 kol ïa ka Onfroy United, ïa ki kol na ka Grounded FC la thep da u Dresionmi Sumer haka minit ba 43 bad u Chanborlang Krem haka minit ba 45.
La pyntip ka jingïakhun lashai ka sngi 8/1/2025 kan long haka por 9 baje mynstep hapdeng ka Tyrshang pyrshah ïaka Tympang SC Iongshiwiat, haka por 11 baje mynstep ka Nongkhroh Sohbar pyrshah ïaka Tyllilang i Moobakhon.