- Yn leit rah ka DC Karbi Anglong sha ka sorkar ban weng noh ia ka khyrdop khrong khajna ka KAAC
- Ka Khyrdop jong ka KAAC ka pynthuh shibun ia ka leit rep leit riang ki paid nongshong shnong ka thaiñ Khanduli
Ka shnong Khanduli mynta ka sngi kala pynlong ia ka jingkhang shnong bad pynlong ia ka jingialang ha ryngkat ki paidbah nongshong shnong ba marjan lem bad ki sengbhalang bapher bapher na Ri Lum Khasi Jaiñtia, na ka bynta ban dawa na ki bor jong ka Karbi Anglong District ban weng noh ia ka jaka khrong khajna (Tax gate) kaba la buh ha ka jaka ba dang don ka jingpynbeit ha ki bynta jong ka shong Khanduli. Mynta ka sngi la donlang ruh ki nongmihkhmat na ki bor District jong ka West Jaiñtia ryngkat ki pulit.
Mynta ka sngi ia ka jingialang la pyniaid da u ma Yooshida Nongspung Waheh Shnong Khanduli, ha kaba la ioh ruh ki jingkren na u Waheh Shong Namdong-B ma Damian S. War, waheh Shnong Moodop Nartiang ma Damonmi Dkhar bad kiwei kiba la ong ba lada don katei ka gate ka buh jingeh ia ki paidbah ka thaiñ ha ka jingiadei bad ka kamai kajih bad kane ka jingleh jong ki Karbi-Assam ka long kum ban pyniapher jait briew.
Na ka liang ki sengbhalang kiba kynthup ia ka JSU, KSU, HANM, JSM, HBDRF bad kiwei de haba kren kila ong ka Assam na ka por sha ka por ka shait pyndik ia ki jait bynriew Khasi Pnar ha kaba kane kam dei ka shuh ka sein kaba nyngkong, kaba dang shu jia ka dei ha Mukrroh bad kiwei de kum ha Lapih bad kumta ter ter. Na ka liang jong ki nongialam seng kila kren shai ba ka Khaduli ka dang hap hapoh u pud u sam jong ka jylla Meghalaya. Shuh shuh kila pynrem ruh ia ka jingkren ka Deputy Commissioner West Karbi Anglong kaba la kam ba ka Shnong Khanduli ka dang hap hapuh u pud u ang jong ka Karbi Anglong District (Assam).
Hadien ka jingialang na ka liang ki nongialam bad ki paidbah kila rai ban leit sha katei ka jaka, hynrei na ka liang ki bor District jong ka West Jaiñtia ki la shah ban leit tang uwei uwei u nongialam ki Waheh Shnong ryngkat ka jingpahara ki pulit. Haba poi ha katei ka jaka na kaliang ka Deputy Commissioner, SP ka West Karbi kila don lypa ha katei ka jaka bad ka jingiakren na ka liang ki nongialam seng ki la ong ia ka DC Karbi Anglong, ba ki wan hangne na ka bynta ban phah pyndam noh ia ka jingkhrong khajna jong ka Assam ha kane ka jaka ym kano kano ka jinghuri hura.
Ki nongialam seng ki la pynsngewthuh ruh ia ka DC Karbi ba lada kin weng tang ia kane ka jaka khrong bad kynriah ruh ia ki pulit ba pahara ha kane ka jaka, ka la biang khnang ba ki paidbah ka thaiñ kiba leit rep leit riang bad kiba kamai kajih kim nym shah pyndik bad kila ong lada ki kwah ban buh ia kane ka gate ki la lah ban buh shapoh u pud u sam jong ki hi.
Katba na ka liang ka DC Karbi Anglong ka Krishna Baruah, ka la ong ban kin ap ne ai por katto katne sngi na ka bynta ba kan pyntip ia kane sha ki bor ba halor ha kaba na ka liang jong ki ruh kim kwah ban mih kano kano ka jingiakhajia ha kane ka jaka.
