Ka Elaka Lakadong Sports Association (ELSA) ka la iai bteng ban pynlong ia ka Football Tournament kaba la tip kum ka “1st Elaka Lakadong Knockout Football Tournament 2021-22” ha shnong Lama.
Ha ka jingialehkai kaba nyngkong la pynlong mynta ka sngi ha ka por 11:00 mynstep hapdeng ka Shnong Umlyngsha FT pyrshah ia ka Shnong Natbor FT, ha kaba ka Shnong Umlyngsha kala lah ban pynliem ia ka shnong Natbor da 2-0 kol.
Ka jingialehkai kala long shisha kaba iakhait, hynrei dei ha ka minit kaba 23 jong kane ka kylla step u Ajoy Talang ula ioh ban pynkhih ia ka jar jong ka shnong Natbor FT.
Haba bteng pat ia ka kylla miet jong ka jingialehkai, ka Natbor FT ka la iakhun tyngeh ban ioh pynphai ia katei ka kol hynrei da ka jingskhem ki rangapdien jong ka Shnong Umlyngsha te kim lah ban leh eiei bad kumta ka jingiakhun ka la iaid shaphrang haba ka Shnong Umlyngsha ka la ioh biang ban thep ia ka kol ba ar kaba itynnad bha lyngba u Piarly Chadong ha ka minit kaba 54.
Ha ka jingialehkai kaba ar pat ka la long ha ka por 1:00 nohphai sngi haba ka jingialehkai hapdeng ka Lakadong Ummat SCC pyrshah ia ka Lama YSC, haba ka jingiakhun ka la long ka itynnad bha hapdeng arliang manla kaba la pynshongshit ia ki nongwanpeitkai mynta ka sngi khamtam na ka liang ka Lama YSC ka la ialehkai ha madan lajong hynrei ki rangialehkai jong ka Lakadong Ummat SCC kim kheiñsting haba ki la ialehbha mynta ka sngi da kaba thep 2 kol bad ia kitei ki kol la ioh ban thep da u Deibor Rymbai ha ka minit kaba 41 bad ia ka kol ba ar la ioh thep da u Miki Lyngdoh ha ka minit 45.
Kumta ka jingialehkai ka la nangshongshit shuh shuh hadien ba ka Lama YSC ka la shah thep haduh ar kol haba ki la pyrshang ban ioh pynphai ia kitei ki kol hynrei kim lah namar ka jingialehkai bha ki rangap dien jong ka Lakadong Ummat SCC bad khatduh ki la ioh ban pynphai tang shikol ha shwa ban kut ka jingialehkai lyngba u Arbikrik Rymbai ha ka minit 70. Kumta ka Lakadong Ummat SCC kala lah ban pynliem ia ka Lama YSC da 2-1 kol.