Ka lympung ïalehkai phutbol ba la tip kum ka ‘Open To All Knockout Football Tournament, 2022’ ba la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar (50 snem) ka jingshakri ban pynkiew ïa ka kam ïalehkai Sports hapoh ka District, mynta ka sngi 9 tarik u Naiwieng kala sdang ïa kane ka jingïalehkai phutbol ha madan Kiang Nangbah Stadium, Dongmihsngi Jowai.
Haba phai sha ka jingïakhun ba nyngkong mynta ka sngi 9 tarik Naiwieng na ka liang ka kynhun ïalehkai jong ka Ummulong SS&CC kala lah ban pynliem da 2-1 kol ïa ka Soomer, ïa ki kol na ka Ummulong SS&CC la thep da u Tremiki Lamare ha ka minit ba 24 bad u Cleofast Bamon ha ka minit ba 64. Katba ïa ka shikol na ka Soomer la thep da u Damechwa Dkhar haka minit ba 29.
Ha ka jingïakhun kaba ar ka SBSA Academy EJH kala jop da shikol (1-0) ia ka Ialong FC bad ïa katei ka kol la thep da u Das Dkhar ha ka minit ba 74.
Ka jingïalehkai lashai ka sngi 10 tarik u Naiwieng kan long hadpeng ka Jalapang FC Wahïajer pyrshah ïa ka Iatyllilang FC Wapung ha ka por 12 baje mynsngi, katba ha ka jingïakhun ba ar ka Seinpynbhalang Sahsniang pyrshah ïa ka Mukhla Mission ha ka por 2 baje nohphai sngi.
******************************