Ka lympung ïalehkai phutbol ki khynnah skul kaba la tip kum ka ‘District Level Inter School Subroto Mukherjee Cup Football Tournament 2024’ bala pynïaid da ka ophis jong u District Sports Officer West Jaiñtia Hills District, Jowai kala poi sha ka jingïakhun Pre Quarter Final mynta ka sngi 14 tarik ha madan Kiang Nangbah Stadium, Jowai.
Haba phai sha ka jingïakhun ha ka kyrdan Under-17 (Boys) ka North Liberty H/S School kala lah ban pynliem da 1-0 kol ïa ka Mihmyntdu Sec. School. Ka Laishnong H/S School kala pynliem da 4-3 kol ïaka On and One English Sec. School da ka jingïashut Tie Breaker.
Ka St. Dominic H/S School kala pynliem da 3-0 kol ïaka Seiñraij H/S School. Ka Sawlyngdoh H/S School kala jop da 2-0 kol ïa ka Mihmyntdu R.C Eve Sec. School.
Katba ka Kiang Nangbah Govt H/S School kala jop da ka jingïashut Tie Breaker da 3-2 kol ïa ka Ummulong Presbyterian H/S School.
Ka jingïakhun lashai ka sngi 15 tarik ha ka kyrdan U-17 Boys kin don lai tylli ki jingïakhun, katba ha ka U-15 (Boys) kin don ar tylli ki jingïakhun.
