Jop u samla Wanraplang Thubru sa ha ka ‘World Fitness Federation ha Sikkim 

U samla Wanraplang Thubru  ula long syndon u nongjop haka Overall Champion in Bodybuilding, ha ka rynsan pyni dohksah bala pynïaid da ka ‘World Fitness Federation’ kaba la tip kum ka Mr. & Ms. East India Zonal Body Building & Models Championship ba la pynlong ha nongbah Sikkim ha kane 6 tarik u Naiwieng, 2022.

Kane ka jingjop jong u Wanraplang Thubru uba dei trai na ka shnong Nangbah Iawmusiang West Jaiñtia Hills District kala wanrah burom ym tam ïa ka Ri-Lum Jaiñtia hynrei wat ïa jylla hi baroh kawei namar ka jingdon kum kine ki rangïalehkai kiba tbit.

Shuh shuh halor kane ka jingjop u samla Wanraplang Thubru na ka liang ka Meghalaya Body Building & Fitness Association bad kumjuh na ka Jaiñtia Body Building & Fitness Association (JBB&FA) kila pynpaw ka jingai khublei ba kyrpang ïa utei u samla uba la wanrah ïa ka nam bad ka burom jong ka jylla, ha ka juh ka por kine ki Association ki ai ka jingkitbok kitrwiang ïa une u samla ba un dang kiew shaphang ha kane ka kam ïalehkai kaba long ruh kum ka lad ban ai mynsiem ïa kiwei de ki khun samla.

Ïa kane ka jingïakop pyni dohksah jong ka World Fitness Federation la pynïakhun ïa ki nongïalehkai ha kin ki kyrdan bapher bapher kiba kynthup ïa ka Body Building, Bermuda, Denim Jeans bad ka Women Sports Model.

Haba phai sha ki nongjop kiba dei napoh ka jylla Meghalaya ha kane ka rynsan pyni dohksah ha ka Junior Bodybuilding u Lalremawai Sangma ula wan ha ka kyrdan 2^nd Place, ha ka Bermuda Beach Model u Vivian Pajuh ula wan 2^nd place,  u Aristottel Rynjah 4^th place bad u Lucky Man Kynjin ha ka 5^th place

Ha ka Women figure ka Whitney Lyngdoh Mawphlang kala jop haka 2^nd place bad ka Averyl Lanong ha ka 3^rd place. Ha Women’s Sports Model ka Averyl Lanong 2^nd place, ka Whitney Lyngdoh Mawphlang ha ka 3^rd place 

Ha ka Denim Jeans Model (short) u Lucky Man Kynjin ula wan 1^st place, u Kitbok Shangpliang haka 2^nd place. Ha ka Denim Jeans Model Tall u Rohit Barua ula wan ba nyngkong ha ka Overall Champion in Denim jeans model.

Ha ka jingïakop Bodybuilding ha ka kyrdan 60 kgs category, u Ebenezer Khongsit ula wan ha ka 2^nd place bad u Ioanis Sangma haka 4^th place. Katba ha ka liang ki 70 kgs category u Wanraplang Thubru ula long u nongjop jong ka Overall Champion in Bodybuilding mynta ka snem jong kane ka rynsan pyni dohksah.