Ka seng Meghalaya People United Front (MPUF), East Jaintia Hills District ha ka jinngialam u President u ma Kyrshan Blah mynta ka sngi 19.11.2024, ryngkat u SDO Sadar ka EJHD u A. Verma bad ki nongtrei jong ka Food and Supply kiba kynthup ia ka kong E.V. Pariat, Sub Inspector Supply, u bah MSS Sohklet na ka ophis jong ka Supply, ki la jurip bad tohkit bniah ia ki dukan die marbam (Rashon) ha ki thaiñ jong ka Lad Rymbai. Ha kaba ka seng ha kane ka jingleit jurip ka la buh ka jingmana ba baroh ki dukan ki dei ban buh ia ki dor tiar ne ka Price List ha ka dukan jong ki.
Ha ka jingleit jurip na ka liang ka seng bad ki heh sorkar ba dei peit ia ki jingdie ia ki mar bam hapoh kane ka thaiñ ki lap ba don katto kattne ki dukan ha kane ka thaiñ kiba die ia ki tiar kiba ym shym la thoh ia ka tarik ba la kut ka por. Kumta na ka liang ka seng bad ki bor sorkar ki la maham tyngeh ia kine ki dukan ba kim dei ban buh ia kum kine ki jait tiar kiba ym don ia ka tarik ba la kut por bad lada lap ia kine ki dukan ka seng bad ka tnat treikam jong ka sorkar kaba dei peit ia ki marbam mardih, kin sa shah khang khyrdep.
Shuh shuh na ka liang u President ka MPUF u la ong ba kane ka jingjurip kam long tang mynta ka sngi hynrei ka seng bad ki bor sorkar kin sa leit jurip shuh shuh na ka por sha ka por ia ki dukan die marbam. Namar ka jingdie ia ki marbam ka long kaba kongsan ha kaba dei ban phikir bha kumno ki marbam ki long.
Na ka liang u ophisar uba dei peit ia kane ka kam ruh u la ong ba na ka liang ka ophis kam ailad ban don ki dukan kiba die ia ki marbam sha ki paidbah kiba la kut por ne ki ba la sniew. U la ong ba ka tnat sorkar lada ka la lap ia ki dukan kiba leh beaiñ yn sa khang khyrdep ia ki.