Ka Shnong Panaliar, Jowai ha ka jingialam ka Panaliar Tourism & Environmental Development Society (PTEDS), mynta ka sngi ka 31.08.2024 ka la leit jurip (Inspect) ia ki jaka ba ladep pynkhuid bad ha kajuh kapor la pynkhuid ia kiba dangsah ki bynta ka Syntu Ksiar naduh na lai lad Wah Langhung ban leit sha Kiang Nangbah Memorial Park.
Hashwa ban pynkhuid ladon ka jingialang kaba lyngkot ba la pyniaid da u Wombai Sumer President PTEDS, la ai jingkren na u General Secretary ka shnong Marryngkat Syngkon bad la ai khublei da u Hawamut Challam Secretary PTEDS.
Ha ka jingkren u General Secretary, u la iathuh ba kine ki sngi ba lah dep, ka shnong ka la phah pynkhuid da kaba ai nongsngi ia ki briew, ban pyni ia ka jinglong trai ia kitei ki jaka jong ka Syntu Ksiar, mynta ka sngi pat ka don ka iatreilang kat sha ki jka ba lah ban pyndep. U la kyntu ia baroh ki paralok najan najngai, kiba wan sha kitei ki jaka, ban iaidkai pyngngad ba kim dei ban bret pathar ia ki jakhlia kat shaba lap ha baroh shi lynter ka Pynthorwah bad khamtam ki bynta ka Syntu Ksiar.
U la ong ruh ba ka shnong kan pynshitom bad daiñ kuna da kaba heh bha, ia kiba khwai ha ki bynta ka Syntu Ksiar, yn pynshitom ruh ia kiba leh pyrshah ia ki aiñ shnong. Shuwa ban pynkut u la ong ba ka jinglehkhuid kadei ka dawai ban pynkhuid ia ka lyer kaba ngi ring bad pynhiar mynsien, to ngin lehkhuid ha baroh shilynter kitei ki jaka jong ka Pynthorwah.
U Secretary jong ka PTEDS u la ai khublei ia u bah Barima Laloo, uba la ai mon sngewbha ia ki briew jong u ban pynkhuid ia baroh shilynter ka surok kali, kaba imat ymdon Muster Roll shuh ban peit. U la ai khublei ia ki nongthoh khubor, ia ki dkhot shnong bad kumjuh ia u Waheh Shnong, ba u lah ban iadonlang.