Ki nongialam bad ki dkhot ka Voice of the People Party (VPP), kiba kynthup ia u President rangbah ka Party u bah Ardent Basaiawmoit, President ka EJHD ma D. Rymbai bad kiwei ha kane ka 30.11.2024 ki la hiar sha ka shnong Nongsning kaba hap hapoh ka Elaka Narpuh, East Jaiñtia Hills District, na ka bynta ban jurip ia ki tyllong um bam um dih kiba la jan ban duh noh syndon.
Kane ka jinghiar jong ki dkhot ka VPP ka long ba hadien ki nongialam ka shnong ki la kyrpad ia ki nongialam ba kin wan ban peit bad ban jngoh hi da lade ia kane ka tyllong um bam um dih namar ba ka jingshah ktah na ka jingwan ka Coke Factory kaba don ha kane ka jaka ba don ki tyllong um bam um dih ka shnong.
Katkum ka jingiathuh jong ki nongialam shnong ki ong ba ka um saw lane um ktieh ka tuid na u lum uba shna ia ka Coke Factory bad ka tuid beit sha kine ki tyllong um bam um dih bad kane ka lah ban wanrah ia ka jingduh nong kaba khraw eh ia ki nong shnong baroh kawei namar ba tang kane hi ka tyllong um bam um dih ba ka shnong ka don ia ka jingshaniah ban ioh ia um kaba khuid ba suba kaba lah ban pyndonkam ia baroh ki nongshong shnong.
Na ka liang ka seng ka la ong ba kan sa don lang bad ka shnong ha kane ka jingpyrshah ka jong ki ban tei ia kane ka Coke Factory kaba lah ban pynduh noh ia ka tyllong um bam um dih ka jong ki.