U Myntri Rangbah ka jylla u Conrad K Sangma mynta ka sngi u la leit ban jurip ia ka surok na Wansing Bazar sha Dorrengre ka ba jngai kumba 5.5 Km ryngkat ka pisa ba la mang ka kot haduh 5.56 Klur tyngka.
Ha ka jingiakren jong u bad ki paidbah hadien ka jingjurip u Myntri Rangbah ka jylla, u la ong ba ka dei ka jingdonkam jong ki nongialam shnong jong ka shnong ban pyntrei noh ia katei ka surok, “Kane ka surok ha ka surok Dalu-Gambegre ruh ka don hajan bha bad ka Tura bad ka long kaba kongsan na ka bynta ki paidbah jong ka thaiñ kiba la ju ïakynduh ïa nga da kaba minot na ka bynta ban shna ïa kane ka surok” la ong u Myntri Rangbah.
“Nga sngewkmen ban ïadon bynta bad phi mynta ka sngi ba ïa ka DPR na ka bynta kane ka surok la pynkhreh da ka tnad PWD bad shen yn sa sdang ïa ka jingtrei ïa kane ka surok,” u la pyntip.
Ha kane ka jingiakynduh na ka liang ki nongshong shnong ki la pyntip ruh sha u Myntri Rangbah halor ka jingsah teng ka jingpyntrei ia ka Chisakgre Sub Centre ha kaba la sdang ban trei hynrei mynta la shu iehnoh kumto.
Ki nongshong shnong ki la pyntip ruh ha u Myntri Rangbah ka Jylla halor ka jingdonkam ban don ïa u Transformer bad ki ïing shong ïew ha Wansing Bazar.
U Myntri Rangbah ka Jylla ula pynthikna ïa ki paidbah ka thaiñ ba ïa ki jingdawa jong ki paidbah yn sa peit bad bud-dien katba ïa ka Market Shed na ka bynta ka Ïew yn sa mang na ka Chief Minister’s Development Fund.
Ha kane ka sngi hi na ka liang u Myntri Rangbah ka Jylla, u Conrad K Sangma, u la iashim bynta ha ka jingialap ia ka Swachhata Hi Seva (SHS) 2024 kaba la sdang naduh ka 17 tarik Nailur 2024 bad pynkut ha ka 2 tarik Risaw 2024.
U Myntri Rangbah ka Jylla, mynta ka sngi, u la iashim bynta ha ka jingpynkhuid bad pynitynnad da kaba pynpaw ba ka jingkhuid jingsuba kam dei tang na ka bynta kawei ka por ne kawei ka sngi bad la kyntu ia ki paidbah ban pynneh ia ka jingkhuid jingsuba man la ka sngi ha ka jingim jong ki da kaba pynlong ia ka kum ka bynta jong ka kolshor, ki jinglong bad ka jingim jong ki.
Kum shi bynta ban pynkhuid bad pynitynnad ia ka sor Tura u Myntri Rangbah ka jylla u la iashim bynta ha ka jingpynkhuid ia ka sor Tura Super Market Complex. Ha kane ka sngi la donlang ruh u Deputy Commissioner, West Garo Hills bad kiwei kiwei ki ophisar na ka bor synshar District bad ka Tura Municipal Board.
