Ka 13 tarik Iaiong ka dei ka sngi jingsngewsih ia ki Khasi Pnar ha Block I & II: HBDRF

Ka Hynñiewtrep Border Dispute Redressal Forum (HBDRF) lyngba u Chairman jong ka u Bah Chandame Sungoh u la pynpaw ba ka sngi 13 tarik Iaïong (April) ka dei ka sngi jingsngewsih ïa ki paid Khasi Pnar kiba shong basah ha Raid Nangtung kaba tip mynta kum ka Block -II bad ka Elaka Labang Nangphyllut kaba tip myntra kum ka Block – I.
Ka Forum ka pynkynmaw ba dei ha kane ka sngi ha ka snem 1951 ba ka Sorkar Assam kala khlad jubor ïaka Raid Nangtung bad ïa ka Elaka Labang Nangphyllut na ka Ri Jaiñtia na ka Jowai Civil Sub-division bad pynïasoh jubor ïaka sha United Cachar Mikirs & Hills, Karbi Anglong Autonomous Council mynta lyngba ka Assam Government Notification No. TAD/ R/ 31/ 50/ 149 haka por ba thaw ïa ki District Councils. Ia kane ka kam la leh donbor daka sorkar Assam khlem ka jingtip lane jingmynjur jong ki paid Khasi Pnar jong kane ka thaiñ kiba dei ki trai shnong jong kane ka jaka.
Kumta ka Forum bad ha ryngkat ki paid nongshong shnong jong kane ka thaiñ ki ñiew ïa kane ka sngi kum ka sngi ka jingsngew sih. Bad ki pyrshah jur ïakane ka jingleh donbor jong ka sorkar Assam kaba long ka jingiuh roit ïaka hok longbriew manbriew jong ki bad ki dang iai dawa ban wanrah biang lane pynïasoh biang ïakane ka jaka sha ka ri ki Kpa tymmen jong ki sha Meghalaya.
Bad ki khmih lynti ba ha kane ka jingthmu jong ka sorkar Meghalaya bad Assam ban pynbeit ïa u pud u sam te ki nongshong shnong jong kane ka thaiñ kin ïoh noh ïaka hok jong ki bad ïa kane ka jaka yn pynïasoh pura noh shaki bynta pdeng jong ka Ri Khasi Jaiñtia kumba juh long naduh hyndai hynthai kulong kumah.