U President jong Ka TMC Meghalaya u Bah Charles Pyngrope haba kren mynta ka sngi sha ki ladpathai khubor u la ong ba ki MLA jong ka TMC kim lah ban leit phai biang sha ka Seng Congress wat lada ka don ka jingtyrwa na ka Seng Congress namar ba ka don ka aiñ – Kyntiap seng kaba teh lakam ia ki.
U Nongialam jong ka Congress u Ronnie V Lyngdoh dang shen u la ong ba ka Congress ka pdiang sngwbha ia baroh kynthup ia ki MLA jong ka TMC bad ia u chief Minister barim ka jylla Meghalaya u Dr. Mukul Sangma lada ki kwah ban iatrei lang na ka bynta ka jingbha jong ka Party Congress.
U President jong ka TMC u la ong ba ka daw jong ka jingiapher ka don na bynta ki nongialam barim jong ka Congress ki bym dei ki MLA bad ki lah ban leit phai da kaba suk sha ka Seng Congress ha kano kano ka por khlem ki jingteh kyndon.
Haba iadei bad ki MLA pat ka long kaba eh namar ba ka don ka aiñ kyntiap seng. U bah Charles Pyngrope u la ong ruh ba kan sa don ka jingpher lada baroh 4 ne 5 ngut ki MLA ka TMC kin leit phai biang sha ka Seng Congress.