Ka Proseshon Iukharist kaba shisien shisnem jong ka Parish Jowai ka la long hynne ka sngi (08/12/24) ha madan skul Marianhill Higher Secondary School, Jowai, ha kaba da ki hajar ngut ki para-bangeit napoh ka Jowai Diocese bad nabar ki la iawan ban shim bynta ha kane ka proseshon Iukharist ka Parish Jowai.
Ha ka por 10 baje mynstep la pynlong ia ka Jingknia Mas paidbah, kaba la lamkhmat da u Most. Rev. Ferdinand Dkhar d.d, Bishop ka Jowai Dioceses ha ryngkat ka jingsynranlang ki Lyngdohsohblei napoh ka Diocese bad nabar. Ha kane ka Jingknia Mas paidbah da ki hajar ngut ki paid riewngeit ki la iashim bynta ha ka iabam ka iasip ia U Kpu U Rynsi Uba la pynkyntang Uba long ka Met bad ka Snam jong u Trai Jisu Khrist nalor ki khynnah kiba pdiang ia ka Komunion kaba nyngkong ha ka jingim jong ki.
U Bishop Ferdinand Dkhar ha ka jingkren sneng kren kraw jong u ia ki paidriewngeit, u ong ba kane ka dei ka por jong ka Aiom Advent bad ka Aiom Advent ka dei ka Aiom ka jingpynkhreh ia ka jingkynmaw ia ka jingwan longbriew U Jisu Khrist u khun ba marwei jong U Blei sha kane ka sla pyrthei mynba arhajar arphewsan snem mynshwa bad ka por Advent ka dei ka aiom jong ka jingkylla ym tang kaba shabar bad kaba kongsan eh kaba shapoh ka mynsiem bad ka dohnud bad na ka jinglong iapait iapra sha ka jingiasuk ka jingiatylli, na ka mynsiem bishni pihuiñ sha ka mynsiem ka jingiaieid, ka jingsbun bad ka jingiarap markylliang.
Nangta u Bishop Ferdinand u ban shuh shuh ba ka aiom Advent ka dei ka Aiom jong ka jingkylla kaba mut na ka jinglong barim sha ka jinglong kaba thymmai, kiba don ha ka jingdum ban ap ia ka sngi ka jingshai, kiba iapait iapra kiba iashun iapen sha ka jingiasuk khamtam ha ka jingiadei bad U Blei. U Bishop Ferdinand u pynkut ia ka jingkren sneng kren kraw jong u da kaba kyntu ia ki paidriewngeit da kaba ong ban ioh ia ka jingsuk donkam ia ka mynsiem kaba sngewrit kum u Ioannis Baptist “Ma U, U dei ban nangkhraw, nga pat ban nangrit” (John 3:30) na ka mynsiem khwanlalot sha ka mynsiem sngewlem, na ka mynsiem ehdohnud sha ka mynsiem jemnud. Ngi long ki briew jong ka Advent bad kum ki briew jong ka Advent to ngin pynkhreh ia ka jingwan longbriew jong U Jisu Khrist ha kane ka sngi Khristmas.
Ha ka por 1:30 nohphai sngi la pynllong ia ka jingiaid proseshon na madan Skul Marianhill sha Iwmusiang, Mission Compound, Iongpiah, Dulong, Tpep—pale wan phai biang sha madan Marianhill. Ka jingiaid proseshon ka long kaba iaidbeit iaidryntih ha kaba ki paidriewngeit ki la iashim bynta shongkun shongblei ha ki jingduwai bad ha ki jingruwai ha baroh shilynter ka jingiaid proseshon.
Ha shwa ban ioh ia ka jingpynkut da ka jingkyrkhu da ka Sacrament bakhuid tam ka Duwan na kti u Bishop Ferdinand Dkhar, la ioh ia ka jingkren kaba sngewtynnat shaphang ka Sacrament Iukharist bad ia ka jingdon bad ka jingshong rieh jong u Jisu, u khun u jong u Blei bad uba long hi ruh u Blei hapoh u Kpu uba la pynkyntang da u Phadar Laurence Paswet, Principal ka Marianhill Higher Secondary School.
