Ka Annual Meet kaba 16 jong ka Synjuk ki Seng Rangbah Katholik Diocese Jowai kaba la sdang ha ka 19 tarik Lber bad kut hynnin ka sngi 20 tarik Lber 2022 ha Amlarem Parish, Syiem Jingsuk, ha kaba da ki spahngut ki Rangbah na ki 18 Parish jong ka Jowai Diocese ki la ïawan ban ïashim bynta ha kane ka jingïakynduh jong ki kaba shisien shisnem. Ha shwa ban sdang ki programe pyrkhat kam jong ka Synjuk, la don ka jingpynher ïa ka Lama jong ka Synjuk da u ma Vincent H. Pala MP jong ka Lok Sabha Shillong Parliamentary Constituency ha ryngkat ka jingruwai ia ka Anthem jong ka Synjuk da ki dkhot jong ka Synjuk.
U ma Vincent H. Pala, haba kren ha kane ka sngi u pynpaw ïa ka jingkmen ka bakhraw kum uwei na ki longkpa haba u la ïoh ïa kane ka lad ban ïashim bynta lang bad ki dkhot jong ka Synjuk wat hapdeng ka jingbun kam. U ma Vincent H. Pala, u kongsan ha kane ka sngi ha ka jingkren jong u, u la kyntu kynrong ïa ki Dkhot jong ka Synjuk ym tang ban tei ïa ka bha ka miat jong ki longïing ki longsem, ban pynbiang ïa ka bam ka sa, ïa ka kup ka sem jong ki khun ki kti, hynrei dei ban don ruh ka Policy treikam jong ka Synjuk ha ka ban tei ïa ka ïmlang ka sahlang, ka bha ka miat hapoh shnong hapoh thaw, ha ka Balang bad ïa ka jaitbynriew hi baroh kawei ba kan nangïaid shaphrang ha ki sngi bad ki por ki ban dangwan.
Ha kane ka sngi la ioh ruh ia ka jingkren sneng kren kraw kiba sngewtynnat ia ki dkhot ka Synjuk da u Rev. Phadar Augustine Lamin, Rector ka St. Joseph Narbini Seminary Ummulong, uba long ruh u Spiritual Director jong ka Synjuk ki Seng Rangbah Katholik ka Jowai Diocese bad na u Rev. Phadar G. Shangpliang Parish Priest jong ka Syiem jingsuk Parish, ka Shnat niam ka Diocese Jowai.
Ha shwa ban jied bad ban pynthymmai ïa ki Nongkitkam jong ka Synjuk la ïoh ruh ïa ka Annual Report ka jingtreikam jong jong ki dkhot ka Synjuk ha ki Parish bapher bapher jong ka Diocese.
Ha ka 20 tarik sngi U Trai la don ka jingkñia Mass bakhuid (Solemn High Mass) kaba la lamkhmat da u Rev. Phadar Martin Shylla Chancellor ka Jowai Diocese ha ryngkat ki Lyngdoh Sohblei (Phadar) kiba ïa donlang ha kane ka sngi bad ha ka por Mass la don ka jingpynkup bor ïa ki Nongkitkam bathymmai jong ka Synjuk bad ba kin treikam bad pynïaid ïa ki kam jong ka Synjuk katkum ki kyndon jong ka Riti treikam jong ka Synjuk. La pynkut ïa kane ka sngi da ka jingpynhiar ïa ka Lama jong ka Synjuk da u ma Lahkmen Rymbui, MLA ka thaiñ uba long ruh u Myntri ka Sorkar Jylla ba dei peit ïa ka tnat sorkar Home, Education etc.