Ka jingleh Niam ia ka Behdeiñkhlam ka Sein Raij Mukhla ka la poi mynta sha ka sngi ba ar katta ka dei ka sngi Mulong, ha kane ka sngi Mulong ki Khun ka Seiñ Raij Mukhla dang step kila mih na la ïing la sem ban leit sha khlaw ban leit pom ia ki ar tylli ki diengkhlam ki ban sa pynieng u wei ha madan Tih Kyndaw ha Wahshnong bad u wei pat ha madan Ryngkew ha Slot Masi.
Hadien ki la dep ban pom ia kine ki dieng khlam ha ka por 01:00 janmiet ki khun ka Seiñ Raij Mukhla hapoh ka jingialam u Pa Langdoh Niam bad ki Waheh Sankur kila ia leit ban rah ia kine ki ar tylli ki diengkhlam bad ia kine ki diengkhlam la buh ia ki ha madan ban pynieng ia ki lashai ka sngi.
Ha kane ka sngi leit rah diengkhlam la iadon bynta lang bad u Rgh, Wailadmiki Shylla MLA. Hadien ka jing wanrah ia kine ki artylli ki diengkhlam la ioh biang ban ia shong Dorbar Niam ban ia pyrkhat ia ki kam Niam kiba ki khun ki hajar ka Seiñ Raij Mukhla ki hap ban pyndep lashai ka sngi Musiang kaba dei ka sngi ba 3 jong kane ka jingleh Niam ia ka Behdeinkhlam bad ia kane ka Dorbar Niam la pyniaid ia ka da u Pa Langdoh Niam ka Seiñ Raij Mukhla u Wh Wanbha Lyngdoh.
