Ka National Horticulture Board lyngba ka Ministry of Agriculture & Farmer Welfare jong ka sorkar India ha ryngkat ka jingïatrei lang bad ka Meghalaya State Agriculture Marketing Board bad ka Directorate of Horticulture mynta ka sngi kala pynlong ïa ka ‘Krishi Mela Cum Awareness Programme’ ha Multi Facility Center Shangpung Molibang.
Kane ka prokram ka long shi bynta ban pynsngewthuh sha ki nongrep shaphang ki skim jong ka sorkar bala pyntrei da ka Cluster Development Programme hapoh ka Ri.
Ïa kane ka prokram mynta ka sngi la pynbit pynbiang lyngba ka ophis jong ka District Horticulture Officer West Jaiñtia Hills District bad la don bun ki kynhun SHG bad ki Society kiba la la wan sha kane ka prokram bad ban pyni ruh ïa ki mar rep khamtam ïa u shynrai Lakadong uba la bna halor ka jingbiang ka Curcumin ba u don, ha ka juh ka por kila ïoh shibun ki jinghikai.
U kongsan ha kane ka prokram u dei u u MDC ka thaiñ u ma J. Treilang Suchiang uba la thang ruh ïa ka sharak lem bad ki ophisar jong katei ka tnad kum ka dak jong ka jingplie ïa kane ka prokram.
Haba ai jingkren ula kyntu ïa ki nongrep ka thaiñ ba kin long kiba trei minot ha ka kam rep jong ki, namar ka jinglong jingman jong kane ka jaka ka long kaba siesoh bha. Ula ong ba na ka liang ka sorkar ruh ka ïaleh ban ai jingïarap ïa ki nongrep lyngba ki symbai, ki dawai bad ki skim bapher bapher khnang ba yn lah ban pynkiew shuh shuh ïa ki nongrep hapoh ka jylla.
U ma EMH Passah uba dei u Distric Horticulture Officer ha ba ai jingkren ula ong ba kane ka Cluster Development Programme ka long ka lad ban ïarap ïa ki nongrep jong ka District naduh ka rukom sdang ïa ka kam rep, ka rukom pynmih bad haduh ka jingpynïaid ïew ïa ki marrep jong ki.
