U General Secretary jong ka Meghalaya Pradesh Congress Committee u Bah Manuel Badwar haba kren sha ki lad pathai khubor ha ka 6 tarik lber 2026 u la ong ba ka Congress kam pat iakren eiei ban pynïeng kyrtong na ka bynta ka MP By Elekshon hadien ka jingkhlad noh u MP ka Shillong u Dr Ricky AJ Synkon. Nalor kata u la pyntip halor ka jingmih khubor hamsaia ba un iakhun ia ka Elekshon MP ka long ka bym dei namar ka Congress kam pat iakren ei ei halor ka jingpynieng ia u kyrtong ban iakhun ia ka MP By Elekshon.
Shuh shuh u la pyntip ba lada ka Congress ka pynieng ia u kyrtong na ka bynta ka MP By Elekshon u dei ban long u kyrtong uba la ih ha ka kam sain pyrthei bad uba la biang ka jingnang jingstad khnang ba lada shah jied un rah ia ki mat ha ka Parliament khamtam haba iadei bad ka mat ILP bad ban pynithuh ia ka ktien Khasi bad u la ong ka BJP ka la tikna ba kam ai ia ka ILP bad ban pynrung ia ka ktien Khasi. U la ong ka Seng Congress ka don palat 100 tam ki MP ha Parliament bad ki don ki MP kiba ia synrop lang bad ka Congress ha Parliament. Lada ki paidbah ki jied ia u kyrtong ka Congress ka kam jong u MP ka Congress ka long ba un pynsngew sha baroh ki MP jong ka Congress halor ka jingdonkam ia ka ILP bad ban pynrung ia ka ktien Khasi ha ka khyrnit kaba phra.
Khatduh u la pynpaw ka shong beit ha ka party lada ka jied ia uno uno u briew bad un dei u briew uba biang bad uba don ia ka jingshemphang bad ka jingnang jingstad.
