Jowai: Na ki daw ba ka jingsaphriang jong u khniang jingpang Covid-19 ka dang jur hapoh West Jaintia Hills kumta ban iada ia ki nongshong shnong na kane ka khlam na ka liang u District Magistrate mynta ka sngi ula pynmih biang ia ka hukum ba ka Containment Measures kan dang treikam hi hapoh ka District tad haduh ban da pynmih hukum da kumwei pat.
Kane ka hukum ka dang khang ia ki jaka pule baroh, ki jaka ai jinghikai hynrei pat la bthah ban pyndonkam da ki online class. Baroh ki jait jingialang paidbah ym pat shah, ha ki jaka ba iap briew yn shah tang 20 ngut kata ruh ryngkat ka jingiohbor na u DC ne SDO (Civil) Amlarem, ka jingiathoh shong kurim ruh yn shah tang 20 ngut bad ym pat shah ban pynlong ia ki jingkhawai paidbah.
Ym pat shah ia ka jingwan jong ki nongjngohkai pyrthei na shabar jylla.
Katba ka hukum kala shah ia ka jingplie ia ki iew 50% kiba don ha nongbah Jowai bad kila lah ban plie hynriew sngi kata naduh ka sngi Monday haduh ka sngi Saturday naduh ka por 9:00 AM haduh 5:00 PM. Ki iew ne dukan kin hap ban iaid hi da ki Odd bad Even number bad ki hap ban bud ryntih ruh ia ki kyndon jong ka koit ka khia.
Ka korphiw miet kan dang treikam naduh ka por 8:00 PM haduh ka por 5:00 AM. Kiwei pat ki jingbthah ki dang neh hi kumjuh kumba la pynmih ha ka hukum mynshem taiew.
