Ka Synjuk Ki Nongthohkot Khasi ne Khasi Authors’ Society (KAS) ka la pynlong ia ka Dorbar Pyllun ha ïing Dorbar Jaiaw Shyiap Lumpyllon ha ka 7 tarik Jylliew 2025 ha ka ba la jied thymmai ia ki nongkitkam na ka bynta u snem 2025-2027 bad la iatai ruh halor ki mat ba kongsan ki ba dang sahteng da ki phew snem bad katto katne ki kam thymmai ba dei ban shimti ha ka lawei. Ka dorbar ka la sdang da ka ba kynmaw tympang ia ki dkhot ba la khlad noh, kum ki jong u Bah Maurice G Lyngdoh bad Bah Darlingstone Dkhar (bam kwai ha Dwar U Blei) bad la bud ryngkhi da ki ktien lamphrang na u khliehduh Dr. D R L Nonglait bad ka kaiphot na u Saiñpyniar, Dr Ronald P Kharshiing.
Kiwei kiwei ki mat ba kongsan ba la ia tai ha ka dorbar ka dei halor ka ba iakhun ban pynrung ia ka ktien Khasi sha ka Khyrnit Baphra jong ka Riti Synshar ka Ri India, ka ba pynmih ia ka dienshonhi na ka ktien Khasi sha ka Khasi bad sha ka ktien phareng (English) bad byllai ki kam rakhe ia ki riewkhraw kum u Thomas Jones, Soso Tham bad kiwei kiwei ki jingialang sah kynmaw ha baroh shisnem. La pdiang dkhot ruh ia ki nongthoh thymmai ki ba kynthup ia u Bah Kitbok Nongkhlaw, Dr Badahunshisha Jana, Bah Banjop Leo G Kharmalki, Kong Frugiferous Diengdoh, Kong Jennifer Lyngkhoi, Kong Elisabeth Shylla, Dr Heipor Uni Bang, Dr Herina Dohtdong, Dr Rosa Mystica Mawlong, Bah Rangkitbok C Dohkrut bad Kong Evanisha Pathaw.
Ki dkhot thymmai ba la jied kum ki nongkitkam ki long u Dr D R L Nonglait la iaineh kum u Khlieh Rangbah, Dr K D Ramsiej, Symbud Khlieh Rangbah, Dr Ronald P Kharshiing, Saiñpyniar Lumlang, Dr Esmarjune Kharpan, Symbud Saiñpyniar, Bah Kitbok Nongkhlaw, Treasurer, Dr M M Khymdeit, Sainpyniar jong ka Jylli Pynmihkot (Publication Committee) bad san ngut ki dkhot ha ka lyngwiar ki dkhot rangbah ba kynthup ia ka Prof Streamlet Dkhar, Dr Esther June Shongwan, Prof Badaplin War, Prof Desmond L Kharmawphlang, bad Bah Raphael Warjri. Ka jingialang ka la banjur halor ka jingdonkam ban trei shitrhem ia ki kam ki ba dawa na ka bynta ki samla pule bad ka imlang sahlang baroh kawei ha ka liang ka ktien bad ka pule dangle ha ka ba la pyrkhat thymmai ban pynsngew sha ka sorkar jylla ban pynlong noh ia ka ktien Khasi kum ka ktien sorkar, khnang ban kham khia thew kiwei kiwei ki jingdawa jong ka seng ha ki bynta ki ba bun ha ka imlang sahlang.