U Myntri Rangbahduh ka ri, u Narendra Modi, ha ka bynta kaba 123 jong ka Mann Ki Baat kaba la long mynta ka sngi, u la rakhe ia ka jingriewspah jong ka India ha ki kam shna jingshna, ki kam saindur bad ka sap tynrai da kaba kdew sha ka Eri Silk kaba kyrpang jong ka Meghalaya, kaba dang shen ka la ioh ia ka jingithuh ba pawnam jong ka Geographical Indication (GI) Tag.
Da kaba ithuh ia ka riti dustur ba riewspah jong ka India ha ki kam saindur, ki kam shna jingshna, bad ki jingtbit tynrai, u Myntri Rangbah Duh u la batai kumno kawei pa kawei ka thain jong ka ri ka don ia la ka jong ka jinglong bad ka pateng lyngba ki mar tynrai jong ka ri. Napdeng kine, ka Eri Silk na Meghalaya ka paw kum ka dak jong ka jingpynneh pynsah, ka riti dustur, bad ka jingtrei kti.
“Ka Eri Silk kam dei tang ka jain, ka dei ka pateng jong ka Meghalaya, kaba la pynneh pynsah da ka jingieid bad kyntiew katba dang iaid ki pateng, khamtam da ka jaidbynriew Khasi”, la ong u Myntri Rangbah Duh. U la kdew ia ka rukom pynmih ba kyrpang jong ka, kaba long kaba long ka bym ktah ia ka mariang, kaba la pynlong ia ka ban ioh ia ka nam Ahimsa Silk, namar ba ki khniang silk kim ju shah ktah ha kaba sei ia u ksai. U la bynrap, “Mynta, ka jingdawa ïa kum kine ki mar ka kiew stet ha ka pyrthei, ki bym don ka jingpynthut bad kim don kano kano ka jingktah kaba sniew ïa ka mariang, kumta, ka Eri Silk jong ka Meghalaya ka dei ka mar kaba paka bha na ka bynta ki ïew ha kylleng ka pyrthei.”
U Myntri Rangbah Duh u la iaroh ia ka jingdawa kaba nang kiew ha ka pyrthei ia ki mar kiba iadei bad ka mariang bad kiba lah ban pynneh pynsah bad u la pynpaw ia ka jingngeit skhem ba ka Eri Silk ka long kaba biang bha ban pynbiang ia kane ka jingdawa. “Kane ka silk ka pynlong ïa phi ban syiad ha ka por tlang bad tngen ha ka por lyiur, kaba pynlong ïa ka ban long kaba biang bha na ka bynta ki jait suinbneng bapher bapher bad kane ka kyntiew ia ka jingiaid iew jong ka ha ki iew hapoh bad shabar ka ri,” u la ong.
U Modi u la iaroh ia ki kynthei ka Meghalaya kiba mihkhmat da kaba thaw ia ki Self Help Group ban kyntiew ia ka jingpynmih, ban pynneh pynsah ia ka kam, bad ban pynmih ia ki lad kamai kiba lah ban neh. U la ai khublei ïa ki paidbah ka Meghalaya halor kane ka jingjop kaba phylla bad u la pynshlur ïa ki nongshong shnong ha kylleng ka ri India ban kyrshan ïa kum kine ki mar tynrai.
Da kaba kyntu ia ka ri ban pdiang ïa ki kam khadi, ki kam shna kti, u Myntri Rangbah Duh u la pynpaw biang ïa ka mynsiem jong ka Vocal for Local bad ka Atmanirbhar Bharat Abhiyan. “Lada ki nongthied ki thied tang ïa ki mar ba la shna ha India bad ki nongkhaïi ki die tang ïa ki mar ba la shna ha India, ka jingïakhih ban shaniah ha lade jong ka India kan ïoh ïa ka bor kaba ym lah ban khanglad,” u la ong.
Ka bynta kaba 123 jong ka Mann Ki Baat ka dang bteng ban pynpaw ïa ka jinglong tynrai jong ka ri India kaba shaniah ha lade bad kaba don tynrai ha ka kolshor, kaba pynpaw ïa ki khana shaphang ka jingsarong, ka jingïaishah, bad ka jingkiew shaphrang na ki bynta bapher bapher jong ka ri.
