U Myntri Rangbah ka jylla u Conrad K Sangma ha ba ai jingkren mynta ka sngi ha Rangatari, South West Garo Hills, ula ong ba ka sorkar lyngba ki prokram bapher bapher kala trei shitom ban wanrah ka jingmyntoi ha ka jingim jong ki nongshong shnong ka jylla.
Ia kane ula kren sha ki nongioh jingmyntoi lyngba ka skhim FOCUS plus, ka PROGRESS, Yess Meghalaya bad ki SHGs. Ula ong ruh ba ka sorkar ka kut jingmut ban kyntiew ia ki kam rep kam riang bad ki kam ri jingri da kaba pyntreikam ia ka FOCUS bad kiwei de ki skhim ban kyrshan ia ki nongshong shnong ka jylla.
Lyngba kine ki skhim sorkar kila don haduh 4.5 lak ngut ki nongrep kiba la ioh jingmyntoi hapoh ka jylla. Ula ong ba ha ki sorkar ba mynshuwa ym ju don kum kine ki skhim ban pynmyntoi ia ki nongrep. Kane ka skhim ka dei kawei na ki skhim kaba heh duh hapoh ka thaiñ Shatei lam Mihngi, lyngba kane ka skhim la lah ban pynioh jingiarap mar T.5000/- tyngka sha uwei pa kawei ki nongrep jong man la ka thliew ïing bad kan bteng haduh 10 snem. Ula pynshai ruh ba kane ka skhim FOCUS kam dei satia ka jingairam kumba don kiba la pynsaphriang khubor lamler, hynrei da kaba shai kane ka dei ka skhim jingiarap ia ki nongrep ula ong shuh shuh.
Kumta ka sorkar kala mar T.450 klur tyngka ban pyntreikam ia kane ka skim bad na kane T.150 klur la dep ban sam sha ki nongioh bynta hapoh ka jylla. Namarkata ka jingjop jong kane ka skhim ka shong ha uwei ba kawei ki nongioh jingmyntoi na kane ka skhim. Da kaba khmih lynta ba lyngba kane ka jingiarap kan wanrah ka jingkylla ha ka jingim jong ki briew.
Ha kane ka prokram kila don haduh 793 ngut ki nongrep jong ka Rangatari kila ioh jingmyntoi kaba la kot sha ka T.7.93 lak tyngka lyngba ka FOCUS+. Kumba 400 ngut ki nongri sniang kila ioh sniang symbai, 70 ngut ki nongri syiar kila ioh ia ki syiar Kuroiler lyngba ka Rural Livestoct Piggery & Poultry skhim ‘PROGRESS’.