–Wan plie u bah Alexander Laloo Hek ia ki painkhana jong ki khynnah kynthei ha Umden Umroi RMSA Secondary School Ri-Bhoi–
Ka Indus Towers Limited, kawei na ki kompeni ba heh tam ha ka pyrthei, ha ka jingiatreilang bad ka Northeast Centre for Equity Action on Integrated Development (NEAID), ka la plie ia ki paiñkhana kiba la pynkhreh bha bad kiba khuid na ka bynta ki khynnah kynthei ha ki lai tylli ki skul sorkar jong ka thain Ri-Bhoi bad East Khasi Hills.
Haba iaroh ïa ka Swachh Bharat Abhiyan jong ka Sorkar India, ïa ka jingbei tyngka ïa ki jingtei pynkhuid ba la shna thymmai ha Umden Umroi RMSA Secondary School, la iaroh da u Myntri ba donburom jong ka tnad Animal Husbandry bad Veterinary; U Bah Alexander Laloo Hek, ha ka jingiadonlang u MLA jong ka Umroi konstitwensi ma Damanbait Lamare, u Special Project Director ka SSA; Swapnil Tembe IAS bad u Rajender Singh Gurung, Circle CEO-NESA jong ka Indus Towers Ltd.
Ka jingthmu ka long shi bynta jong ka Corporate Social Responsibility prokram, ka Pragati ka ba kongsan jong ka Indus Towers. Kata ban pynbiang ia ki jaka pynkhuid kiba shngaiñ, da kaba wanrah ia ka koit ka khiah bad ka jingkhuid jingsuba, na ka bynta ka jingpule.
U Hek, u la ong “Kane ka jingthmu ka dei ka sienjam kaba kongsan ban kyntiew ia ka jingkhuid jingsuba, ka burom, bad ka jingbha jingmiat baroh kawei jong ki khun kynthei jong ngi, kiba ju iakynduh jingeh namar ka jingbym biang ki jaka pynkhuid ha ki skul. Nga ïaroh ïa ka Indus Towers na ka bynta ka jingpyrshang ba dei ban ai jingïaroh ha kaba pynlong ïa kane kaba lah bad pynshlur ïa ka jingïatreilang kaba dang ïaid shakhmat ban pyniar ïa kum kine ki jingpynbha sha kiwei pat ki thaiñ jong ka jylla Meghalaya.”
Ka projek ka iadei bad ar tylli ki bynta kiba kongsan jong ka jingpule jong ki khynnah kynthei – ki jingtei bad ka jingpynsngewthuh (infrastructure and awareness). Nalor ka jingshna ia ki paiñkhana kiba khuid, ka prokram ka kynthup ia ki jinghikai kiba bniah shaphang ka jingkhuid jingsuba ha ka por ba poi bnai, kiba la shna khnang ban pynpra ia ki jingkhang ha ka imlang sahlang bad ban pynkupbor ia ki samla pule da ki jingtip kiba kongsan shaphang ka koit ka khiah.
U Rajender Singh Gurung, Circle Chief Executive Officer (CEO) jong ka Indus Towers Limited u la pynpaw ïa ka jingshimkhia jong ka kompeni ban kyntiew ïa ka roi ka par: “Lyngba ka prokram CSR ba kongsan jong ka Indus Towers ‘Pragati’, “Ngi thmu ban weng ïa ki jingduna ba kongsan ha ki jingtei bad ban pynkupbor ïa ki shnong ki thaw. Nalor tang ki jingtei, kane ka jingthmu ka wad ban pynkupbor ïa ki samla pule da ka burom, ka jingshaniah, bad ka jaka kaba shngain. Da kaba pynthikna ia ka mariang kaba khuid bad kaba shngain, ngi ialeh ban pynroi ia ka jingsngewrit hapdeng ki samla pule katba ngi dang tei ia ka rukom sumar kaba pura hapoh ki skul, kaba ai jingmyntoi ha kaba kut ia ka imlang sahlang baroh kawei.”