Ka Hynniewtrep Youth Development Council (HYDC) Sengkmie ha ryngkat bad ka East Jaintia Hills District ha ka 19 tarik Nohprah 2025 ka la wan sha ka jaka ba pynlong ia ka Public hearing jong ka M/s Shree Cement ha shnong Daistong.
Haba kren mynta ka sngi na ka liang u President ka HYDC Sengkmie u la pynpaw ba katkum ka Notification ba la pynmih da ka Sorkar lyngba ka state Pollution Control board ka la khot ia baroh ban pynsngew ban ai ia ka jingkren haba iadei bad ka Public Hearing ba la pynlong da ka Meghalaya State Pollution Control Board halor ka jingkwah ka Shree Cement ban buh ia ka Cement Plant ha ka shnong Daistong.
Hadien ba la poi ha kane ka shnong ban pynsngew na ka bynta ki nongshong shnong jong ka Shnong Daistong bad ki paidbah ka East Jaintia ki dkhot ka Seng ki la shah khang lynti ha ka Elaka bad ha ki nongshong shnong ban leit pynsngew lyngba ka Seng ia ki nongshong ka shnong Daistong bad ka East Jaintia baroh kawei.
Nalor kata u la ong ba ka Seng ka buh jingkylli ia ka Sorkar jylla bad kumjuh ia ka Sorkar India baroh kawei ba hato kane kam dei mo ka jingknieh noh ia ka hok.
Ka Constitution jong ka Ri India ka kdew shai ba ka don ka hok ban kren bad lyngba kane ka Seng kan leit ban pynsngew sha ka Sorkar balei lah knieh noh ia ka hok jong ki paidbah ba la buh ha ka Constitution jong ka Ri India.
ka Seng ka la ong ba ki wan shane ban pynsngewthuh ia ki paradoh para snam kiba don hangne ban pynsngew ia ka jingdon jong ki bad ka Seng ka khlem wan ban pynklumar ne ban thaw kino kino ki jingklumar, bad ka Seng ka wan da kaba pynsngewthuh bad ban pyntylli ia ka jaitbynriew baroh kawei.
Khatduh u la bynrap kane ka pynlong ia ki nongialam Sengbhalang ba ka Jaitbynriew ka don ia ka jingpharia haba iadei bad ka jingwan ki mynder shisngi arsngi na ka bynta ka jingmyntoi shi tyngka 2 tyngka .
