Kum shi bynta ban ai ka jingpynsngewthuh sha ki paidbah halor ka jingsniew jong ka jingdih sikret ne duma ka Tep Kyndait Govt. UP School, Tuber Kmaichnong kala pynlong ia ka jingiaid paidbah ne ka ‘Rally aginst Tobacco’ mynta ka sngi da kaba sdang na ka phyllaw jong katei ka skul.
Ha kane ka Rally la iashim bynta da ki khynnah skul bad ki nonghikai jong katei ka skul da kaba rah artad ia ki placard ba don ki jingthoh shaphang ki jingsniew jong ka jingdih ne jingpyndonkam ia u duma, ryngkat bad ka jingkynhoi bad pyrta. La pynpaw ruh ba ka jingdih duma ka la ban pynpluh wat ia ki khlaw ki btap da ka jingleh sting jong ki briew kiba mlien ha kane ka jingdih duma bad kane hi ka wanrah ia ka jingshah ktah jong ka mei mariang. Ka jingpynlong ia kane ka prokram ka long ruh shi bynta na ka jingrakhe ia ka World No Tobacco Week.
Ia kane ka Rally la lam khmat da baroh ki nonghikai ryngkat bad ki nongtrei jong ka skul ban pynpaw ia ka jingiatreilang na ka bynta ban pynduh pyndam ia ka jingdih sikret ne duma ha ki sawdong sawkun jong ka skul. La kyntu ruh ia baroh ki nongshong shnong ban mih shakhmat na ka bynta ban pynduh ia kane ka jingmlien kaba sniew bad ban pynduh pyndam syndon ia ka.
