Ka All Khasi Meghalaya Tourist Taxsi Association (AKMTTA) hynne ka sngi ka 18 tarik Nailur 2025 ka la wan sha ka jingialang hadien ba ki bor pyniaid jong ka District Administration ki la khot kyrkieh ia ki nongialam jong ka hadien ba ki la pynlong ia ka jingiakhih, ha kaba ki kali na Assam ki la khang lut ia ki kali Meghalaya ha Jorabad bad Khanapara.
Haba kren sha ki lad pathai khubor na ka liang u Nongaiktien jong ka AKMTTA u Bah Balajied Jyrwa u la ong ba ka AKMTTA ka khlem khang ia ki kali Assam ban wan sha Meghalaya bad dei tang ka jingsam ia ki kot lynkdop ia ki nongniah kali tourist na Assam.
Nalor kata u la ong ba ka dei tang ka jingsngewthuh bakla ka AKMTTA ka khlem iakhih bad ka sorkar Assam hynrei ka iakhih bad ka sorkar Meghalaya.
Shuh shuh u la ong ba ka Sorkar kan sa khot iakren ha ka 23 tarik Nailur hapdeng ki tnad sorkar bapher bapher ba kynthup ia ka tnad jngohkai, ka tnad Transport bad ka tnad Home bad ka kynhun ka AKMTTA na ka bynta ban ia pynbeit halor kane ka bynta bad kaei kaba mih ha ka jingialang bad ki tnad bapher bapher jong ka Sorkar ka AKMTTA kan sa shim ia ka rai.
