U Spokesperson ka National People Party (NPP), Bah H. M. Shangpliang u la ong ba ka jingiakhun ha Elekshon shiteng samoi ha Gambegre ka long hapdeng ka kyrtong ka NPP bad ka TMC katba ka Congress kam don ha ka jingiakhun namar ka jingiatan tyllai ban jied kyrtong.
Haba kren sha ki ladpatahi, u Bah H.M. Shangpliang u la ong ba hadien ba ka Election Commission ka la dep ban pynbna ba ia ka Election Gambegre yn pynlong ha ka 13 Tarik Naiwieng 2024 , na ka liang ka NPP ka la jied ia ka l. Mehtab Chandee Sangma, ka kurim jong u Myntri Rangbah, ban long kum ka Kyrtong ha kane ka Elekshon.
“Na ka liang ka NPP ka la lah ban wanrah shibun ki kam pynroi ha ka Garo Hill baroh kawei bad hapoh ka jingïalam u Conrad K. Sangma u la shna bun ki surok, ki jingkieng ki madan ialehkai, ki ban pynlong ba ki paidbah kin jied ia ka kyrtong ka NPP” ong u Bah Shangpliang.
Shuh shuh u la bynrap,”Ka jingleh bha ka NPP kan wanrah ia ka jingsngewthuh sha u paidbah ba dei ban pynjop ia ka kyrtong ka NPP, kumba ka long mynta hi ki paidbah ki kwah ban jop ka NPP”.
U la ong ruh “Ha kaba iadei bad ki kyrtong ban iakhun ia kane ka Elekshon shiteng samoi, ka kyrtong TMC ka Sadhiarani M Sangma kaba long ka MDC bad ka kurim u Zenith sangma u MLA barim, ha ka nongpeit hi ka jingiakhih kan long hapdeng ka kyrtong ka TMC bad kyrtong ka NPP katba u kyrtong ka Congress um don ha ka jingiakhun namar ka jingiatan tyllai ban jied kyrtong”.