(Da u M.M.Thaiang)
Ha ki ar snem kiba la dep na ka daw jong ka Covid-19 (Corona virus) ka Parish Jowai kam shym la lah ban pynlong ia ka Proseshon Iukharist kumba ju long shisien shisnem, ha kane ka snem 2022, ka Proseshson Iukharist jong ka Parish Jowai kan long ha kane ka 11 tarik mynta u bnai (11/12/2022), ha sor Jowai.
U Phadar Hilarius Lamare Parish Priest ka Parish Jowai, u ong ba ka jingpynkhreh ia kane ka Iukharist Proseshon ka la iaid shait shait da ki jingduwai pynkhreh (Tridum) bad mynta ka sngi ki paidriewngeit ka sor Jowai ki la ia mih paidbah hynne ka sngi (08/12/2022) ban pynkhreh ia ka jingiaid beit iaid ryntih jong kane ka Proseshon Iukharist.
Ha ka 11 tarik shwa ban iaid ia ka Proseshon Iukharist hapoh ka sor Jowai, ha ka por 10 baje porstep (10.00 AM) yn don ka jingknia Mass Iukharist, ha kaba u Phadar Ferdinand Dkhar Diocesan Administrator ka Jowai Diocese un long u Nongkñia Rangbah duh ha ka jingiasynran lang kiwei de ki Phadar (Lyngdohsohblei) na ki Parish bapher bapher jong ka Jowai Diocese bad kiwei de ki Phadar (Lyngdohsohblei) ki ban wan na ka Jylla-niam bah Shillong (Archdiocese Shillong) bad na ka Diocese Nongstoin.
Ka Proseshon Iukharist kan sdang thik ha ka por kumba shibaje shiteng nohphaisngi. Ki Phadar ka Parish Jowai bad ki paidriewngeit ka Parish, ki khot sngewbha ia ki para bangeit na ki Parish bapher bapher ba kin ia wan shim bynta ha kane ka Proseshon Iukharist ka Parish Jowai ha ka ban iaroh bad pyndonburom ia U Blei, Uba shongrieh ialade ha ka dur jong ka Iukharist bakhuid.