-272 tylli ki kynhun VDP na kylleng ki bynta ka District kila poi sha ka Rally ha Jowai-
Ka ophis u Superintendent of Police ka West Jaiñtia Hills District mynta ka sngi kala pynlong ia ka prokram ban ia phylliew jingmut lang bad ki nongialam shnong ki Village Defence Party (VDP) halor kumno ban wanrah ia ka shong suk shong shngaiñ hapoh ka shnong ka thaw da ka jingiatrei lang bad ka tnad pulit.
Ïa kane ka prokram la pynlong ha Indoor Sports Hall Chutwakhu Cum Auditorium, Jowai ha ka jingdonlang jong u kongsan uba dei ruh u Deputy Commissioner ka West Jaiñtia Hills bah Batlang Samuel Sohliya, IAS, u symbud kongsan SP ka WJHD u Chemphang Syrti, MPS, nalor kiwei de ki ophisar pulit.
Ia ka jingialang la pyniaid da u G. Marshillong SDPO, Amlarem, la ïoh ruh ka jingrwai ba kyrpang na ki kynhun pulit kaba la tip kum ka Meghalaya Police Cultural Troupe (MPCT) kiba la ai jingrwai tynrai bad ki jingrwai phareng ban pynshongshit ia katei ka prokram.
Na ka liang u kongsan u bah Sohliya ha ba ai jingkren ula ai ka jingiaroh ia ka tnad Pulit jong ka West Jaiñtia kaba la shim ia kane ka jingiaphylliew jingmut kaba donkam bha hapoh ka imlang ka sahlang ban wanrah ia ka jingshongsuk shong shngaiñ.
ula ong ka jingwan bun ki nongialam VDP na ki shnong bapher bapher kan iarap shuh shuh ban ialeh kumno ban rad dyngkhong ia ki kam sniew hapoh ka shnong ka tnaw naduk ki kam buaid tanglang, ki kam tuh kamthiem, nalor kiwei kiwei de.
Ula ong ba ym dei ban shim ia ka aiñ ha kti hynrei kum ki VDP ki dei ban aiti sha ki bor ka aiñ khnang ban ioh leh ia kaba donkam, ula ong ba ka hok jong uwei pa uwei u briew u don hapoh ka Ri India katkum ki kyndon ba la pynbna da ka sorkar kum ka (Human Right Act).
ki VDP ki dei ki nongtrei mon sngewbha ban wanrah ia ka bha ka miat wat lada kim don kano kano ka jingioh nong, wat lada ki hap ban peit miet peit iong hapoh ka shnong ka thaw.
Kum u Khleih duh ka District u ai ka jingiaroh ia ki VDP ba dei lyngba jong ki kane ka Election MLA ba la dep la lah ban pyniaid beit pyniaid ryntih ia ka hapoh ka District khlem kano kano ka jingmih huri huri, “haoid ki la don hi katto katne ki jaka ba mih jingiakhajia hadien ba la dep niew vote hynrei la lah ban teh lakam ia ki da ka jingtreilang ki bor shnong (VDP).
Shuh shuh ula kyntu ba ka por jong ka aiom slap ka la poi bad kan don ka jingwan lyngshop ki bor mariang kumta u kyntu ia u VDP ban iatreilang bad ki bor jong ka Disaster Management ban suk ka rukom ai jingiarap lada don kino kino jingjia ba sngewsih. Da kaba pynkut ia ka jingkren u kyntu ia ka tnad Pulit ban pynlong man ka por kum kine ki jait prokram kiba iadei bad ki VDP shnong ban wanrah ka jingshong suk shong shngaiñ.
U SP ka West Jaiñtia Hills u ma Chephang Syrti ula kyntu ia ki VDP ban don ka jingïatreilang kaba iajan bha bad ki bor Pulit khnang ba yn lah ban ialeh ne pynduh ia ki kam sniew. Ula ong ruh ba ka tnad Pulit kan pyrshang katba lah ban ai jingiarap sha ki VDP kum ki Touchligh bad kiwei de ki tiar donkam ban pahara shnong.
Halor ka jingwadkam jong ki khun samla ula kyntu ban long kiba la pynkhreh lypa namar shen ka tnad Pulit kan sa khot ia ki kam Pulit ba bun bha ha kine ki sngi ban wan.
Ha ka juh ka por u khot ia ki nongialam VDP ban treishitom na ka bynta ban ialeh pyrshah ia u drug bad kaba nyngkong duh dei ban sdang na la ïing shwa ong u SP.
Ha kane ka sngi hadien jong kane ka prokram la don ka jingiaphylliew jingmut lang kaba la shim bynta da ki VDP shnong jong ka District kila la poi haduh kumba 272 tylli ki VDP bad ki ophisar pulit kiba la jujab ia ki jingkylli.
Ïa ki kyntien ai khublei la ioh da u ma F. Passah (COVDO).
