Jowai: Ka Meghalaya People United Front (MPUF) Central Body ha ka jingialang jong ka CEC mynta ka sngi, ha ophis treikam jong ka ba don ha Jowai, kala pynpaw ka jingsngewsih kaba jur halor ka jingshah siat iap u bah Cheristerfield Thangkiew ha ïing sah jong u kaba don Mawlai Kynton Massar, Shillong.
Ha kane ka jingialang la don lang u President rangbah ka seng u bah D. Laloo, President ka EJHD bah Kyrshan Blah lem bad ki dkhot jong ka CEC, ha kane ka jingialang ka seng kala pynpaw ka jingsngewsih kaba jur halor ka jingshah siat iap u bah Cheristerfield Thangkiew uba dei u nongialam barim jong ka seng HNLC haki pulit ha ïing sah jong u.
U bah Laloo haba kren, u la buh ka jingkylli iaka tnad Pulit ba balei ha shwa ba kin leit sha iing sah jong u bad leit siat iap ia u bah Cheristerfield Thangkiew kim pynithuh shwa kum ki pulit ia kiba ha iing sem jong bah Cheristerfield?
Namar ha kine ki khyndiat sngi bala dep ka sorkar ka pynpaw ha ki lad pathai khubor ka ong ba la phah ia ki pulit ban leit kem ia u bah Cheristerfield ym ban leit siat iap ia u, hynrei kitei ki pulit kila leit siat iap pynban ia u, Kumta ka seng kala dawa ia ka sorkar ban weng kam noh shi syndon ia kito ki pulit ba don kti ban siatiap ia u bah Cheristerfield, bad u la ong ruh lada ka sorkar kam don la ka bor ban peit naka bynta jong ka Pulit Department kamut ka sorkar kam don jingkitkhlieh na ka bynta ka jingshah siat iap jong u bah Cheristerfield, bad lada ki pulit ki lah ban siat ia uno uno khlem da ioh ka order kane ka buh jingma ia ki khun samla jong ka bri u hynniewtrep lashai la shi sngi. Shuh shuh ula buh ruh ka jingkyntu ia ka tnad Pulit ynda kila leit kem ia uno uno u briew ne ka briew ba leh kam sniew ki dei ban da burom shwa ia ki dorbar shnong da ka ba pyntip ia u rangbah shnong namar ka dorbar shnong ka don la ka jong ka hok bad ka bor.