Ka Khooid Ya ka Wah Myntdu (KYM), kaba peit ia ka jingkhuid jingsuba jong ka Myntdu kaba long kawei na ki wah kaba pynbiang iaka um bam um dih ia ki nongshong shnong ka sor Jowai bad ki shnong ba marjan, mynta ka sngi nyngkong jong ka 09.12.2024, ki dkhot jong ka KYM hapoh ka jingialam jong u President KYM ma K. L. Pariat, ki la leit ban jurip ia ki top um jong ka nongbah Jowai, ha ka jingiadei ban sylli bniah ia ka um kaba poi sha ki thliew ïing ki briew ban pynthikna ka dei ban long kaba khuid ba suba.
Mynta ka sngi la don lang ruh u SDO ka PHE Electrical R. Challam, rangbah ka Jowai GH Bareh, Snarbor Laloo, A. Lamare WS Khimmusniang, ma JM Pohsnagap, ma Phrangsngi Sutnga ki nongkit kamshnong bad kiwei de.
Mynta ka sngi ka KYM bad ka la ioh ban jurip ia ka top um dih kiba don ha PWD Jowai, Dongmisngi, Lumkyndong, Moolikso, Mynthong bad Khimmusniang.
Na ka liang u waheh shnong Khimmusniang Jowai, haba kren u la ong kumba long mynta ka um dih na ka wah Myntdu lyngba ka PHE department ka long kaba khuid ba suba ha kum kane ka por tlang hynrei kaba ktah ia ka ka wah Myntdu bad kaba pynjaboh ia ka, ka long ha ka por lyiur, kane ka long na ka daw ka dei na ka jingkiew jong ka jingbun briew ha Jowai bad ki shnong ba mar jan ka wah Myntdu katba nangmih ki sngi kumjuh ka jingjur jong ka jingtih maw, tih shyiap bad ka jingshna ia ki lynti syngkieng lyngba ki rud jong ka wah Myntdu ka la wanrah ia ka jingjakhlia bad jaboh jong ka wah mynta khamtam ha ka por slap.
U ma JM Pohsngap u la ong ba kumba long mynta ka jingwan jong ka um dih ha nongbah Jowai lyngba ka PHE ka la long na ki ar tylli ki thyllong um (Sources) kata na ka Wah Myntdu bad na ka wah Umngot, u la ong ba kumba long mynta ka wah Umngot ka kham khuid ban ia ka Wah Myntdu, na ka liang jong u, u la kyntu ia ka PHE lada long kaba lah, ba ha ka por ba jakhlia ka wah Myndu khamtam ha ka por slap dei ban pyndonkam da ka wah Umngot kaba kham khuid.
Na ka liang u ma G.H. Bareh, u la kyntu ia ki paidbah ban iatreilang na ka bynta ban iada ia ka wah Myntdu, da kaba kim dei ban bret ia ki jakhlia, ki jaboh khamtam ki plastic sha ki bynta jong ka Wah Myntdu khnang ban ioh ia ka umbam umdih kaba khuid.
U ma Snarbor Laloo, u la ong ba ka seng ka la leit jurip ruh ha ki bynta bapher bapher jong ka ka Wah Myntdu, haba la lap na ka jingjur ka tih khyndew ban shna surok na ruh jong ka wah ka la pynjaboh shisha ia ka wah Myntdu, khamtam ha ka por slap, kumta u la ong ba na ka liang ka seng ka la wad ki lad ki lynti kumno ban pynneh pynsah ia ki jingkhuid jong ka wah Myntdu baroh shisnem.
Na ka liang ka seng ka la ai ruh ka jingiaroh ia ka sahep bad ki nongtrei jong ka PHE Electrical Department Jowai, kiba la trei shisha kat kum ka bor jong ka na ka bynta ban pynkhuid ia ka um bam umdih jong ki paidbah ka nongbah Jowai.
