U Bah Titos W Chyne, MDC jong ka Sohra haba kren sha ki lad pathai khubor halor ka jingjia ia 2 ngut ki nongjngohkai ha Sohra da kaba ong ba ka jingjia ka long kaba sngewsih bad ka bym poi pyrkhat ba kan wan kum kane ka jingjia da ki phew snem kam pat ju jia kum kane ka jingjia.
U Bah Titos kum u MDC Sohra u phah ka khubor sngewlem sha ka longïing jong kine ki 2 ngut khamtam ia u Raja Raghuvanshi ha kaba la lap ia ka met jong u ba la khlad noh.
Shuh shuh u la ong kane ka jingjia kan nym dei ban long mawjynthut ne ban pynthut ia ka rukom long baroh shi kata ha ka thaiñ Sohra.
Kum kine ki jingjia ki ju jia ha kiwei ki jylla la ka dei ha ka jinglute ne ki jingjia accident bad kiwei kiwei.
U ai khublei ia ka tnat pulit, ka NDRF ka SDRF, ki tour Guide, ki taksi Association na Sohra kiba la mih shakhmat ban wad biang ia ka met jong ka Sonam Raghuvanshi.
U la bynrap ba kane ka jingjia kan nym don jingktah bad kane ka khubor ka leit sha ki briew kiba na bar ruh bad kane ka jingjia ka shu jia ryngkhat bad kyrpad ia ki briew kiba nabar ban iai wan sha ka thaiñ Sohra, namar ba ka mariang jong ka thaiñ ka long kaba itynnad bha.
U kyrpad ia ka sorkar ban shimkhia halor ka jingkyrpad ki nongialam haba iadei ban buh ia ki jaka pahara lane ki kor CCtv na ka bynta ka jingshngaiñ ia ki nongwan jngohkai pyrthei.
Shuh shuh u bah Titos, u la ong lada ki Pulit bad ka Sorkar kim lah ban wad ia ki shijur ka long ka bym lah pdiang, namar ki Pulit ka jylla ki don la ka jong ka jingtbit bad ka jingstad. U la ong lada kiba haïing jong kine ki shijur kim hun ia ka jingtohkit ba la thaw da ka sorkar ka shong ha kiba haïing ban phah tohkit da kano kano ka agency halor kane ka jingjia.
Haba iadei bad ka jingwad ki Pulit ia ka Sonam kaba dang jah rngai haduh mynta na ka liang u bah Titos u sngewsynei ia kiba ki hap iaid hap hiar ia ki riat bad u kyrmen ba ka jingshisha kan paw noh ha kine ki sngi ban wan.