Ha ki phew snem kiba la leit noh la don ki khun samla Shynrang na ka shnong Byndihati kiba la pyrshang ban jubab ia ka jingkhot u Blei sha ka jinglong Lyngdohňiam pynban U Blei Um pat ibit ibiang bad ia kane ka jingkhot ban long Lyngdohňiam (Lyngdohsohblei) la don u Deacon Resto Shylla u long uba la kloi ia kane ka jingkhot bad la pynkyntang Lyngdohsohblei ia u ha ka 09/02/2025 ha shnong Byndihati kaba hap hapoh ka Parish Khliehriat da u Lyngdohsad ka Jylla ňiam Jowai (Jowai Diocese) u Most. Rev. Ferdinand Dkhar. D.D.
Ha kane ka jingpynkyntang Lyngdohsohblei (Lyngdohniam) ia u Deacon Resto Shylla da ki phew hajar ngut ki paid riewngeit napoh ka Bri U Hynniewtrep bad nabar ki la iawan sha Byndihati ban ia sakhi ia kane ka jingkhot U Blei ia u Deacon Resto Shylla ha ka ban shakri ia U Blei bad iala ki parabriew.
Ha ka por 10 baje mynstep ka Mas Jingkňia Iukharist bad ka jingpynkyntang Lyngdohsohblei ia u Deacon Resto Shylla da u Most Rev. Ferdinand Dkhar ha ryngkat ka jingiasynran lang ki 56 ngut ki Lyngdohsohblei ki ba napoh ka Jowai Diocese, Nongstoin, Archdiocese Shillong bad katto katne ngut ki Lyngdohsohblei na ka Jylla Kerela (South India) kiba la ia wan ban sakhilang ia kane ka jingpynkyntang Lyngdohňiam ia u Deacon Resto Shylla uba dei na ka kynhun jingiasyllok jong u Francis Assisi, ia kiba la kham iatip mynta kum ki OFM.Cap. Ka jinglehňiam ha kane ka sngi ka long kaba iphuh iphieng, kaba shongkun shongblei, naba katba u Lyngdohsad, ki Lyngdohsohblei bad u Deacon Resto Shylla ki dang kiew sha Duwan jingkňia ban pyndep ia ka jinglehniam la pdiangsngewbha ia ki da ki jingrwai bad ka jingshad tynrai da ki khun Samla Khyllood jong ka Balang shnong Byndihati.
U Bishop Ferdinand u kongsan ha baroh ki jinglehňiam, ha ka sneng ka kraw ia ki paid riewngeit, u ong ba hapoh ka Balang, u Blei u don la ka jong ka saiňdur ban long ki longkmie longkpa, ki Nongiathuhlypa, ki Nongsynshar, ki Nonghikai, ki Doktor, ki Syiem, kiwei de ki jingkhot bad ban long ki Lyngdohňiam bad ha kine ki jingkhot bapher bapher ngin pyndep hok da ka jingriewblei na ka bynta ka burom ka jong u Blei bad ka jingkiew irat jong ki paid bynriew ha ka bha ka miat jong ka longbriew manbriew.
Ha ka sneng ka kraw ia u Lyngdohsohblei thymmai (Resto Shylla), u Bishop Ferdinand u ong ka jingkhot ia phi sha ka jinglong Lyngdohňiam ka long ka jingkhot ban shakri ia u Blei bad ia ki paid ki jong u Blei ym ban shah sha kri bad u da shim artat na ki kyntien jong ka jingthoh bakhuid (Mat.20:28) kaba ong “U khun u briew Um shym la wan ba yn dup shakri ia u, hynrei u la wan ban shakri”. Haba kren shuh shuh shaphang ki Lyngdoh. U Bishop Ferdinand u ong “Ia ki Lyngdohňiam Katholik la jied napdeng ki briew, la thung ban long ki Nongmihkhmat ki briew ha khmat u Blei ban tyrwa ia ki jynai bad ka jingknia na ka bynta ki lait ki let la jong, jong u paidbah bad jong u khunbynriew.
Nangta u Bishop Ferdinand u ong, ki Lyngdoh ki dei ki Nongiatreilang kiba bit dor jong u Lyngdohsad ha ba sumar bad bsa ia ka kynhun langbrot jong u Blei, ki long ki Nonghikai, ki Nongpynphriang ia ka ktien ka jong u Blei da kaba ialap ia ka Khubor babha katkum ka jinghikai bad ka jingle jingkam jong u Jisu Khrist, ka jingkňia Iukharist, ka Sakrament jingpyniasuk katkum ka jinghikai pateng jong ka Balang bad ban duwai ban ioh ka jingisynei u Blei na ka bynta u ba bun u baling ia kaba u Blei u la pynkhamti ha ki pynkut ka jingkren sneng kren kraw jong u Bishop Ferdinand.
Ha ka nohphaisngi jong kane ka sngi la don ka jingiaid proseshon kaba lyngkot hapoh ka shnong Myndihati, la pynkut da ka jingkyrkhu ba kyrpang da u Lyngdohsad bad u Lyngdohsohblei ba thymmai bad ka jinglehburom ia u Lyngdohsohblei thymmai.
