Ka sorkar Meghalaya mynta ka sngi 6 tarik Nailur 2024 ka la pynkup burom ia ki Nongialehkai ha KJP Assembly Hall, kiba la wanrah jingjop ha ka jingialehkai World Arm Wrestling Championship 2024 kaba la long ha Moldova.
Ha Kane ka sngi la iadon ryngkat lang da u Myntri Rangbah ka Sorkar Jylla u Conrad Sangma, u Myntri Ka tnad Ialehkai Bah Shakliar Warjri, u Director ka Sport u DD Shira, u President ka Meghalaya State Olympic Association u Bah John F Kharshiing, u Secretary ka Meghalaya State Olympic Association u Bah Finely Pariat ryngkat ki nongialehkai bad ki nongshahkhot sngewbha bad kiwei kiwei.
Ha ka jingkren u Myntri Rangbah ka Jylla, u Conrad K Sangma u la ong, “Ngi tip ba kam long kaba suk ban jop ha ka kyrdan jong ka pyrthei ha kano kano ka kam ïalehkai bad ngin mutdur ba donkam ïa ka jingsngewtynnat, ka jingaiti lut, ka jingïaishah bad ka jingtrei shitom, ngim ju poi pyrkhat ba ngin pynmih ia ki nongjop na ka jylla kaba rit kum ka jong ngi bad kane baroh ka long da ka jingaiei U Blei. Nga sngewkmen ba nga la lah ban iarap ha kano kano ka rukom ha ka liang ka pisa. Ka long ruh ka jingbei tyngka ha ka jingim ym tang ha u snem, hynrei na ka por sha ka por ka sorkar ka ju iarap pisa ban kyntiew Ia ka jylla ha ki kam ialehkai. Ka jingaikhublei, ka jinglong ryntih bad ka jinglong rangbah ban pdiang wat ïa ka jingshah rem kaba ka sorkar ka la pynbor ha kine ki khyndiat snem ba la leit noh”.
Haba kren shaphang ki jingthmu jong ka sorkar ban pynbha ia ka kam ialehkai, u myntri rangbah u la ban jur ba ka sorkar ka la bei tyngka shibun eh ha ki jingtei ia ka kam ialehkai ha kine ki khyndiat snem ba la dep. U la ong shuh shuh ba ki seng ïalehkai bapher bapher la ai jingïarap pisa ban pynbha bad pynïaid ïa ki kam ïalehkai. Ka don ka jingktah jong ka Meghalaya Games ha kaba ka don ka jingpynbha ha ki jingtei ym tang ha ki jingdon jingem hynrei ha ki jingtei ha ki skul. Ka don ka jingpynkylla ia ki jingtei ha kaba la pynlong ia ki jingialehkai bapher bapher.
Ha ka jingpynkut u Myntri Rangbah u la ong ba ka Meghalaya Games kan sa long ha Jowai shuh shuh u la pynbna ruh ba kan don ka lympung ïalehkai phutbol ka Inter Constituency ha kaba baroh 60 tylli ki kynhun na baroh ki konstitwensi kiba ïakhun ha kaba yn pynlong hadien ka Meghalaya Games. U la ong ba kiwei pat ki jait jingialehkai kin bud bad kin ioh ia ka jingkyrshan bad ki rynsan na ka bynta ka jait jingialehkai ban ioh ia ka nam.
Ha ka jingkren jong u myntri ka tnad ialehkai, u Shakliar Warjri u la ai khublei ia ki nongialehkai kiba la jop bad ai mynsiem ia ki da kaba bynrap ba ka sorkar kan bteng katba lah ban kyrshan ia ka State Arm Wrestling Association.
