U President ka KSU Bah Lambok Star Well Marngar haba kren sha ki lad pathai khubor halor ka jingthmu ka Sorkar ban wanrah ia ka lynti rel shaduh Jaintia. U la ong lada phai ia ka mat lynti rel kam dei shuh kaba dang thymmai hynrei ka dei naduh ki snem ba la leit. U la ong ka Seng ka pyrshah ia ka lynti rel namar ka la iohi sha kiwei halor ka jingwan ka lynti rel, ka jingwan buhai shnong kiba na shabar.
Nalor kata u la ong lada phai sha ka jylla Meghalaya ka dang long ka jylla kaba laitlan bad kam pat don ka aiñ ka ban iada, bad lada wan sa lynti rel ka jingma ka ap ia ka jaitbynriew.
u la ong ka Seng ka kyntu ia ka Sorkar ba ka dei ban pyntreikam shwa ia ki aiñ kiba ka jaitbynriew ka la angnud da ki snem, bad ia ka lynti rel sa iakren hadien bad lada ka Sorkar ka wanrah da ka bor ha kino kino ki bynta jong ka bri u Hynniewtrep, ka sorkar kan sa sngewthuh ha kata ka por kaei ka ban sa jia.
Ha u snem 2017 ka sorkar ka la pyrshang ban wanrah ia ka lynti rel haduh Byrnihat bad ka la don ka jingiakhih ha kaba ki dkhot ka KSU ki la rung sha along bad lada ka sorkar kam sngap ia kaei kaba ka Seng ka la pynsngew bad ka Sorkar kan sa sngewthuh ia kaei kaba ban sa jia lada ka thom da ka bor.
U la ong ruh ba ki don ki nongmihkhmat kiba ki thrang ban wan poi ka lynti rel bad u la kyntu ia ki nongmihkhmat ba ki dei ban kren ia ki mat ki aiñ ki ban iada na ka bynta ka jingshong shngaiñ na ka bynta ka Jaitbynriew, wat khohreh ia ka lynti rel bad ki paidbah ki khmih lynti ia ki nongmihkhmat ban thaw ia ki aiñ ban iada ym ban wanrah da kiwei ki lad ki lynti ban pynjulor ia ka jaitbynriew baroh kawei.
