Ka jingmih ka MCTODA Jaiñtia Unit kan ïarap na ka jingshah ot bai kali na ki karkhana: President

Ka Meghalaya Commercial Truck Owners and Drivers Association (MCTODA) Jaiñtia Unit lyngba u President jong ka u ma Heibormi Pariat ha ka jingkren sha ki ladpathai khubor mynta ka sngi ula pynsngew ba ïa kane seng la seng ha Ri-lum Jaiñtia ha ka 26 tarik u Rymphang, 2025 bad kane ka seng kan ïarap ïa ki trai truck bad ki nongñiah truck halor ka dor jong ka bai kit bai bah ïa ki mar ki mata kiba mih napoh ka jylla Meghalaya.
Ula ong ki don shibun ki kam kiba kane ka seng kala dep leh naduh ka jingpynduh pyndap ïa ki jaka lum khajna na ki trok kiba dei jong ki Council bad kane kala ïarap shibun eh ïa ka leit ka wan jong ki.
Kumba long mynta kane ka seng kala treikam kam bha ha ki District jong ka South West Khasi Hills, East Khasi Hills, West Khasi Hills, Ri-Bhoi bad mynta kala sdang ban suh thied sa ha Jaiñtia Hills, ula kren shai kane ka Association kan peit sani ïa ka jingeh na ka jingshah ot khajna jong ka bai kit na ki Karkhana bapher bapher.
Katba u General Secretary ka seng u Shanborlang Suchiang ula pynsngew ïa ki jingeh ba ki trai truck bad ki nongniah ki ïa kynduh ha ka por ba kit ïa ki mar ki mata, namar wat ïa ka bai nong kaba ki dei ban siew (kisti) kam dap shuh ban siew sha ki Bank, da kaba ai nuksa ïa ka bai kali ba kit ïa u Coke ka long tang 1200/- shiton. Kumta ban teh lakam ïa kane ka jingeh donkam ïa ka seng kaba treihok ïa ka kam ban ïakhun borbah na ka bynta ka hok jong ki.
U buh ruh ka jingkyrpad ïa ki Kharkhana bapher bapher hapoh ka Ri-Lum Jaiñtia ba kim dei ban pyndonkam da ki kali la jong haba kit ïa ki mar ki mata jong ki namar kane ka ktah shibun eh ïa ki kum ki trai jylla, da kaba kyntu jur ïa kitei ki Karkhana “ki trai jylla ki dei ban ïoh nong nyngkong ha ka kit ka bah ïa ki mar ma pynmih napoh ka jylla”, khnang ba kin lah ban pyndap pynbiang ïa ka ïing ka sem.
Ula pyntip ïa baroh ki dkhot jong ka seng ba ki dei ban long kiba ïatylli lang kawei haba don kino kino ki kam ban dawa ïa ka hok kum ki trai truck bad ki nongniah khnang ba ki jingtreikam jong ka seng kin long kiba jop.

Na ka liang jong u ma Pariat ula ong kino kino kiba sngewdonkam ban ïakren halor kane kin sngewbha ban phone ha kine ki number 9862266318 / 8787464347 kiba dei jong u President bad u General Secretary ka MCTODA-Jaiñtia Unit.

Ki nongkitkam ka MCTODA-Jaiñtia Unit ki long kumne harum:-

1. President: Shri. Heibormi Pariat
2. General Secretary: Shri. Shanborlang Suchiang
3. Vice-President: Shri. Robel Pakma
4. Joint Secretary: Shri. Wanshan Laloo
5. Treasurer: Shri. Kerson Suchiang
6. Finance Secretary: Shri. Ialam Dkhar