Mynta ka sngi u District Medical Health Officer, East Jaiñtia Hills District, u Dr D.Shylla, u la plie ia ka jaka pyllang snam ha Khliehriat CHC (Blood Storage Centre), ka jingioh ia kane ka jaka buhsnam kaba nyngkong eh hapoh ka District ka long ka jingmyntoi ka ba khraw haduh katta katta ia ki nongshong shnong ka District East Jaintia Hills.
Na ka liang u Dr D.Shylla, u la pynpaw ka jingsngew kmen ba ka CHC ka la lah ban ioh la ka jong ka Centre ban pynlang ia ka snam namar kane ka Hospital mynta ka la don ia ka shi spah jingthiah, ha kajuh ka por u la pynshlur ia ki nongtrei jong ka tnat ka koit ka khiah bad kumjuh ruh ki riew paidbah ba kin wan sha khmat ban ai sngewbha ia ka snam bad kan long ka lad ban iarap ia ki nongpang kiba donkam kyrkieh ia ka snam.
La ioh ruh ka jingkren na u Medical Officer Khliehriat CHC, u Dr C.S. Bareh, u ong ba kane ka dei ka sngi ka ban sah jingkynmaw ia ka Khliehriat CHC ba ka la lah ban don noh la ka jong ka jaka ban buh snam, ha kaba ka Jowai Blood Parent Bank kan long ruh kum ka thymmei ka ban iarap ban ai snam ia kane ka centre, ka jingdon jong kane ka centre kan iarap ha ka ba ym donkam shuh ban phah sha Ialong Civil Hospital Jowai wat lada jia ba u nongpang u duna snam ruh.
Kiwei de kiba la ai jingkren ki kynthup ia ka M&HO i/c Khliehriat CHC, ka Dr B.Khongngaiñ, I/C Blood bank Jowai, Dr P.Shylla bad ka Assistant Nursing Superintendent 100-Bedded Hospital Khliehriat, ka kong T.Suna.