Pynkup burom ka Sorkar Meghalaya ia ki nonghikai skul kaba dei ruh ka sngi kyrpang jong ki Nonghikai mynta ka sngi ka 5 tarik Nailur 2024 ha Soso Tham Auditorium.
Ha kane ka sngi pynkup burom la ia don ryngkat lang U Myntri Rangbah Ka Jylla U Conrad Sangma ,U Myntri ba dei peit ia ka tnad Pule puthi u Rakkam A Sangma, u nongaibuit ka tnad pule puthi u HM Shangpliang, Educational Secretary Ka Sorkar Jylla u Bah DP Wahlang, U Swapnil Tembe U Director ka School Education jong ka Sorkar Jylla , u Vijay Kumar IAS Commissioner & Secretary Ka tnad pule puthi, bad kiwei kiwei ki nongshahkhot sngewbha ha kane ka sngi.
Ha ka jingkren jong u myntri rangbah ka Jylla u Conrad K Sangma haba u pynpaw ia ka jingsngewnguh bad ka jingburom ia ki nonghikai ka Jylla u la ong, “Ngi don hangne ban burom ia phi bad ai khublei, ka jingaiti bad ka jingnoh synniang kaba khraw kaba phi ai kan pyntikna ba ka lawei jong ki khun jong ngi bad ka Jylla ka long kaba shngaiñ bad kaba shai.”
U la ong ruh ba donkam ban don ka jingiakhun kaba bha bad kaba koit ba khiah hapdeng ki skul ha ki kyrdan jong ki District. “Ki skul kiba pynshong nongrim ha ki katto katne ki kyndon bad ym tang ha ki jingmih lah ban ai khusnam bad ki lah ha kajuh ka por ban ïasam ïa ki rukom treikam ba bha tam jong ki bad kiwei pat ki skul da kaba thaw ïa ka jinglong kaba bha ha kaba ki kyrshan iwei ïa iwei pat.”
U la ong ruh ba ki Prokram ïakynduh hapdeng ki skul bapher bapher ha kylleng ki District bapher bapher ki lah ban pynroi ïa ka jingsngewthuh shaphang ki kolshor nalor ba ki ai ïa ki ban ïakynduh ïa ka pyrthei shabar jong ka mariang jong ki hi. U Myntri Rangbah ka Jylla u la kdew ruh ïa ka jingdonkam ban kynthup lang ïa ki ktien lajong haduh ka klas kaba phra ban kyntiew ïa ki ktien lajong.
U la pynkynmaw ruh ïa ka jingdonkam ban kyntiew lang ïa ka thong jong ka pule puthi bad u la ong, “Ka Sorkar ka la pynleit jingmut bha bad ngi dang ïai bteng ban pynbha ïa ka pule puthi da kaba pynlut pisa ha ka pule puthi da kaba pynbeit ïa ki jingeh bad kumjuh ban iarap ia ki nonghikai bad ia ki khynnah khnang ban kyntiew ia ka kam pule ha ka Jylla.
U Myntri Rangbah ka Jylla ha ka jingkren pynkut u la kyntu ïa ki nonghikai ba kin long ki nongshong shnong kiba don ka jingkitkhlieh, kiba stad bad kiba sngewthuh.
Ha kane ka sngi , u Myntri Rangbah u la pyllait ruh ia ka Prokram CM IMPACT. Ban weng ïa ka jingduna ki pass percentage ha ki eksamin SSLC jong ka Jylla Meghalaya, . Kane ka jingthmu kan ai ka jingkyrshan kaba pura ia ki khynnah skul, ki nonghikai, ki skul, ki kmie ki kpa, bad ki District ban kyntiew ia ki jingmih jong ka SSLC.
U Myntri Rangbah ka Jylla bad ki riew pawkhmat ki la pyllait ruh ïa ka Curio Bee’s Learning Box, ka tiar hikai na ka bynta ban pynroi ïa ki jingnang jingstad jong ka Foundational Literacy bad Numeracy (FLN) na ka bynta ki klas Nursery haduh 3, kiba ka rta naduh 3-9 snem bad la pyllait ruh ïa ka Science Discovery Kit, kaba long ka Experiential . Science kit na ka bynta ki samla kiba thaw jingthaw naduh klas 6 haduh 8. Ha kane ka sngi la pyllait ruh ia ki kot lyngkdop jong ka SSA/DERT bad u PM POSHAN.
Ïa ki khusnam State Awards 2024 sha ki nonghikai na ka bynta ka jingshakri ba pawnam bad ba donburom jong ki la ai da u Kongsan U Conrad Sangma bad ki riewdonburom. Ha kane ka sngi la pynkup burom bad ai khusnam ïa 14 ngut ki nonghikai na ki District bapher bapher. U District School Education Officer, East Khasi Hills, Shillong u la pynkup burom ia ka Cathrene Nongrum, ka Assistant Teacher, School & Centre for the Hearing Dindicapped Children, Shillong.
