U Dr. Dominic Shylla ba dei u District Medical and Health Officer (DM&HO), East Jaintia Hills District ula iathuh ba ka jingpang Hepatitis ka dei ka jait jingpang kaba lah ban iabit na uwei u briew sha u wei pat, namarkata ka long ka donkam haduh katta katta ban long kiba phikir bha naduh ka jinglehkhuid ha ka met ka phad khamtam kti bad haduh ka rukom bam rukom dih.
Ia kane u Dr. Shylla ula kren kum u kongsan ha ka jingialang kaba la pynlong ha OST Centre jong ka Khliehriat Civil Hospital, East Jaintia Hills District jong ka prokram kynmaw ia ka World Hepatitis Day kaba la pynlong da ka Ophis DM&HO, Khliehriat.
Shuh shuh u Dr. Dominic ula batai ba kane ka jait jingpang ka dei kaba ktah ia u Dohnud (Liver) bad ka long ruh ka jait jingpang kaba iabit bha para briew. Ula ong ba na ki 5 jait ki Hepetitis ka A,B,C,D bad ka E, na kine ka B bad ka C ki long kiba shyrkhei. La katta ruh lah hi ban iada bad pynkoit lyngba ka Hepatitis B Vaccine bad ryngkat ki dawai dashin. Ia ka test jong kane ka jingpang lah ban leh mynta ha ki jaka sumar kum ha ki Hospital, ki CHC bad ki PHC
La ioh ruh ka jingkren na u Dr. J. Nongtdu, Medical Officer, OST Centre, Khliehriat Civil Hospital uba la iathuh ba ia kane ka jingpang Hepatitis la pynlong da ki khniang jingpang (Virus) bad ka ktah beit ia u Dohnud. Ula iathuh ba kane ka jingpang ka kham kynrei ha ki briew ba pyndonkam da u juh u thyrnia injekshon kum ka jinginjek drug na uwei u briew sha uwei pat.
U Dr. Nongtdu ula kren ruh halor ka phang ‘Bringing Care Closer to You- Hepatitis Can’t Wait’, da kaba pynkynmaw ba mynta la lah ban test bad ai jingsumar ia ki nongpang Hepatitis hapoh Khliehriat Civil Hospital.
Kiwei de kiba la ai jingkren ha kane ka sngi ki long u Ariston Dhar, DPM, NHM, East Jaintia Hills District, Khliehriat bad ka kong Sophia. D. Dkhar, PHN, NHM, East Jaintia Hills District, Khliehriat.