U Myntri Rangbah ka jylla u Conrad K. Sangma haba kren mynta ka sngi ha ka jingialang pyllait kali kit nongpang (Ambulance) ha Dum Dum, Nongthymmai ula ong ba ka jingai jong ka sorkar ia ki kali Ambulance sha ki shnong ne ki seng bapher bapher wat la ka long ka kam kaba rit eh, hynrei pat ka long ka kam kaba kongsan bha kaba ka sorkar ka don ban shakri ia ki paidbah ha ka liang ka koit ka khiah.
U Myntri Rangbah ha ka jingsynrang lang ka MLA jong ka East Shillong ka Dr. Ampareen Lyngdoh, u MDC ka Nongthymmai bah Latiplang Kharkongor, u MDC ka Laitumkhrah-Malki u ban Tantin Joseph Lakadong bad u MLA ba rim ka Nongthymmai u bah Jemino Mawthoh la ioh ban pyllait paidbah ia ka kali kit nongpang lyngba ka skhim CMDSF ha ka jingialang kaba la long ha St. John’s White Hall, Dum Dum, Nongthymmai, Shillong. Nalor ka jingiadon ryngkat ki dkhot ka Dorbar Dong bad ki dkhot ka skul SMC.
U Conrad haba kren shuh shuh ula pynkynmaw ha ka jingwan lynshop ba khlem poi mutdur jong ka khlam Covid-19 bad ka jingeh kaba ia kynduh ha kine ki ar snem kiba la dep hynrei ka sorkar da ka jingiatreilang jong ki nongshongshnong ka la lah ban jop ia ki jingeh ba bun hapoh kitei ki ar snem. U khmih lynti ba kane ka Ambulace kan lah ban ai ka jingshakri bad ban iada ia ka jingim ba kordor jong ki nongshong shnong ban lait na ka jingiap ba khlem dei por. U kyntu ia ki nongshong shnong ba ki dei ban sngew ia kane ka kali kum ka mar lajong bad ban don ruh ka jingkitkhlieh na ka bynta ka bha ka miat jong kane ka kali.
Ha kane ka juh ka sngi u Myntri Rangbah u la plie pyrda ruh ia ka Map kaba pyni ia ki lynti syngkieng (Roadmap) kiba don hapoh ka dong Dum Dum.
Kham ha shwa la ioh ka jingkren na ka liang i kong Ampareen kaba la kyntu ia ki nongshong shnong ka dong Dum Dum ban long kiba leh bha bad ban ai ka jingshakri lyngba kane ka Ambulance da ka jingieit, ka jinglong sbun bad ka jingkut jingmut na ka bynta ka bha ka miat jong ki nongshong shnong baroh.
