U Symbud Myntri Rangbah ka Jylla, Bah Prestone Tynsong u ba long ruh u Myntri ka tnad District Council Affairs (DCA) jong ka Sorkar Jylla u la ong ba ka jingpynjlan ia ka samoi treikam ki ar tylli ki Autonomous District Council kata ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) sa 6 bnai, ka ban long haduh ka 5 Tarik u Lber 2025 ka dei namar ki jingdonkam ai por ban pynbiang na ka bynta ka jingpynkhreh ban pynlong ia ka elekshon ym kumba la kynnoh ba ka tieng ia kino kino ki seng saiñ pyrthei.
Haba kren sha ki ladpathai khubor, u Bah Prestone Tynsong u la ong ba kala rai ban pynjlan ia ka samoi treikam kine ki 2 tylli ki Autonomous District Council, ka ban kut ha u 5 tarik Nailur 2024 ka long ban ai por ruh ia ka Delimitation Commitee ba kan pyndep ban pynbeit pynbiang ia la ka kaiphot halor ka jingpynbeit thymmai ia ki MDC Constituency.
“Hynrei hadien ba ka Delimitation Commitee ka la dep ban leh ia ka kamram bad phah sha ki Council bad na ka Council ka la phah sha ka Sorkar hadien ba la dep ban pdiang da ka iingdorbar jong ki Council khnang ban ioh ban phah sha u lat ka Jylla ban ioh ka jingmynjur bad ia kane la leh katkum ka kyndon jong ka 6th Schedule kaba kdew ba lah ban pynjlan ia ka samoi treikam ka Council, lada don ka daw ka ba skhem, hynrei kam dei ban palat ia ka 12 bnai” la ong u Symbud Myntri Rangbah.
“Namar ba ka kaiphot kane ka Commitee ka dang shu poi sha ka sorkar bad namar ba ki bun kiei kiei kiba dang iaid ha ka bynta ba lah ban pynlong ia ka elekshon kumta ka sorkar ka la shim rai ban dang pynjlan shuh ia ka jingtrei kam ka Council sa 6 bnai, bad iakane la ioh ka jingmynjur na u Lat ka Jylla” la bynrap biang u Bah Tynsong.
U Bah Prestone u la ong shuh shuh ba na ka liang ki ar tylli ki Autonomous District Council ha kine ki bnai ban pynjlan biang ia ka samoi treikam, kin hap ban ai ka jingithuh ia kawei pakawei ka shnong kaba la pynbeit thymmai ha la ki constituency bad ba kin hap ban kynthup bad pynkylla ia ki shnong ki thaw ki ba wan thymmai ne ki ba hap ban leit sha kiwei pat ki Constituency bad tang kane ruh kan shimpor haduh shibnai.
Nalor kane na ka liang ka sorkar kan sa bthah ia ki Deputy Commissioner ba kin sdang noh ban leh ia ka Electro Roll Revision ka ban iaid katkum ka kaiphot jong ka Delimitation commitee ka ban iaid na ka bynta 3 bnai bad kiwei kiwei ki kam ki ba iadei bad ka jingpynkhreh ia ka jingpynlong ia ka elekshon, u la bynrap biang.