U Abu Taher Mondal, Myntri ba khmih ia ka tnad Bording ha ka jylla hynne ka sngi u la pynbna bad pynshai paidbah halor ka jingpynlip light khah khah ha ka jylla (ha katto katne ki dong) ha kylleng ki District ka dei na ka thong ban pynbha bad pynthymmai ia ki kor bad ka jingtrei ia ki ïing ba buh ia ki mashin ban sam bording kylleng ki jaka.
Namar ka jingmih khubor ba ka jingpynlip bording ka dei ka jingthmu jong ka Sorkar da ka ‘Load Shedding’ ne kata ka buit ban tyngkai bording ha ka jylla, u Myntri u la pyntikna ba kita kim dei ki daw hynrei katkum ka jingshisha kadei ba bun ki jaka ki dang donkam ban pynbha, ban maramot, ban kylliang post na ka bynta ka jingbit jingbiang ka bording khlem da shah pynthud ha kano kano ka por khamtam ha ka por lyiur.
U la pynshai ruh ba kane ka dei shi bynta jong ka Revamped Distribution Sector Scheme (RDSS) project kaba dei ka skhim na ka Sorkar pdeng, kata ban kylliang ia ki transformer, ban pynieng ia ki nar ba thymmai bad kiwei kiwei. U la kyrpad ruh ia ki nongpyndonkam bording ban iaishah shipor ba kane ka jingpynlip bording kan nang iai bteng sa katto katne por.